Улаан-Үдын һургуулиин сэсэрлиг соо

Сентябриин 9-эй үдэр Улаан-Үдын 28-дахи бэеэ элүүржүүлгын интернат-һургуулида ехэ хүлгөөтэй байба. Багшанар, шабинар, ажалшад, түрэлхид хэдэн үдэрэй туршада заншалта болоһон “Манай һургуулиин сэсэрлиг» гэһэн уласай семинарта бэлдэжэ, ехэ cүлөөгүй байгаа. 2017 онһоо тyc семинар үнгэргэгдэнэ. Мүнөө жэл огородойнгоо дэргэдэ томо веранда баряа юм. “Һургуулиин дэргэдэхи газар - һурагшадай хэшээлдээ ба хэшээлһээ гaдуур һурган хүмүүжүүлгын үндэһэн» гэһэн уласай семинар энэ байра соогоо үнгэргэбэ.

Һургуулиин огородто тариһан ургамалнуудай выставкэ ехэ үргэнөөр дэлгээгдээ. Үхибүүдэй гэртэхинтэеэ гараараа хэһэн урлалнууд шэмэглэл болобо. Элдэб янзын үхэр нюдөөр шанаһан варени, эмдэ ородог ургамалаар эдеэшүүлэнхэй умдан, дабһалһан эдеэн. Гоё даа. Сугларагшад ама хүрэжэ, сэгнэлтэ үгэхэ аргатай байба.

Эхин һургуулиин ажахын талаар орлогшо Евгения Сергеевна Ждановагай ударидалга доро тогоошон Дарима Доржиевна Пурбуева эхитэй һургуулиин ажалшад бүхы энэ хоол бэлдээ.

Айлшад үглөөнэй 10 сагта бууба. «Сэсэрлиг» соо семинарай эхилһые һургуулиин захирал, педагогикын эрдэмэй кандидат Цырен Раднаевич Базаров соносожо, түсэбтэйнь танилсуулба. Энэ үдэрэй эрдэмэй ажалые хүмүүжүүлгын талаар захиралай орлогшо Любовь Бадмацыреновна Цыренжапова зохёожо, шадамар бэрхээр ударидаба.

Шэнжэлэлгын ажалаараа шалгарһан үхибүүд Янжима Нимаева - 4 кл., Степан Сластин – 4 кл., Артём Галсанов – 7 кл., Софья Юмова - 6 кл., Вероника Степанова - 9 кл., Дулма Цыбикмитова - 9 кл. элидхэл хэжэ, олоной һонирхол татабад. Һүүлдэнь эдэ элидхэлнүүдые Буряад Уласай, Ород Уласай үхибүүдэй шэнжэлэлгын ажалнуудай мүрысөөнүүдтэ эльгээхэ гэһэн дурадхал Уласай эколого-биологическа түбэй ударидагша Елена Николаевна Митыпова оруулба. 28-дахи интернат-һургуулиин огородынь ехэ һайн, үрэ дүнтэй, бэелүүлхэ олон түсэбүүдтэй гэжэ тэмдэглэбэ.

Буряадай багшанарай дээдэ һургуулиин биолого - географическа факультедэй түлөөлэгшэ Евгения Михайловна Пыжикова эндэ хэгдэжэ байһан ажалда, шэнжэлэлгын хэрэгэй түрүүшын алхамуудта дээдын сэгнэлтэ үгэжэ, үшөө олон ондоо аргануудые хэрэглэхыемнай дурадхаа. Хэжэ байһан ажалаа хаанашье харуулхаар, эндээ үшөө ондоо янзын ургамал уpгуулхаар бэлэн байнат гэбэ.

Алексей Петрович Тухалов, Эрдэм һуралсалай яаманай интернатһургуулинуудай таһагые даагша семинарта ерэһэн багшанарые һуралсалай шэнэ жэлээр амаршалжа, интернат –һургуули үндэр дүнтэйгөөр хүдэлжэ, үхибүүдээ ажалай дүршэлдэ зүб һургажа, зүбөөр хүмүүжэлжэ байна гэжэ тэмдэглэбэ.

Болбосоролой ба эрдэм ухаанай яаманай сайдай орлогшо Валерий Анатольевич Поздняков һургуулиин байшан соогуур ябажа, дутуу дундануудые усадхалгада арга боломжоороо нүлөө үзүүлхэ тухайгаа захиралтай - Ц.Р.Базаровтай хөөрэлдөө.

Семинар дээрэ хэдэн жэлдэ хэһэн ажалайнгаа дүнгүүдтэй, үшөө урдахи шэнэ зорилго тухайгаа Л.Б.Цыренжапова элидхэл соогоо үргэнөөр харуулаа. Энэ семинарай үнгэргэлгэдэ шалгаран гараһан зондоо олоной альга ташалган доро баярые хүргөө.

Харин һургуулиин дэргэдэхи газар зүбөөр ашаглаха тухай, ямар ургамалнуудые таридагаа, хайшан гэжэ шэнжэлэл ябууладагаа Любовь Цырендоржиевна Ринчино хөөрэжэ үгэбэ. Хүмүүжүүлэгшын ажалайнгаа хажуугаар энэ һургуулиин дэргэдэхи газарай ажал ударидалгые даажа абанхай. Огородой найман ургамал ехэ элбэгээр ургаа. Нарин сэбэрээр, нэгэшье үрмэдэһэгүйгөөр, нягтаар харууһалагдажа байһые семинарта хабаадагшад бүгэдөөрөө тэмдэглэн, үндэр сэгнэлтэ үгөө.

Хамтын хүсэн урматай даа. Һургуулиин ажалшадай эрмэлзэн, эсэлтэ сусалтагүй хэһэн туршалганууд дүнтэйшье, сэнтэйшье байба. Илангаяа шабинартамнай сэгнэшэгүй туһа хэшээл боложо үгэбэ.

Долсон ГАЛСАНОВА, Улаан-Үдын 28-дахи һургуулиин багша, хүмүүжүүлэгшэ