​Буряадай ниигэмэй объектнүүдэй түймэрһөө һэргылэмжын талаар хиналта гүрэн дотороо эрхимлээ

Нижний Новгород хотодо сентябриин 23-да IT-түсэлнүүдэй Бүхэроссиин мүрысөөнэй дүнгүүд «ПРОФ-IT.2021» гэһэн хуралдаанда согсологдоо. Мүрысөөнэй «Аюулгүй хотын оршон» гэһэн номинацида Буряад Улас түрүүлээ.

Бүхэроссиин можо нютагуудай информатизациин IX мүрысөөнэй түгэсхэлэй шата «ПРОФ-IT.2021» гэһэн хуралдаанда нэрлэгдээ. Буряад Уласай Толгойлогшын болон Засагай газарай  захиргаанай цифровой хүгжэлтын хорооной дурадхаһан «Пожарный мониторинг социально значимых объектов на базе ЕРИП АПК БГ» гэһэн түсэл «Аюулгүй хотын оршон» гэһэн номинацида нэгэдэхи һуури эзэлээ.

Түгэсхэлэй шатада «Региональная интеграционная платформа аппаратнопрограммного комплекса «Безопасный город» Калужской области» (Калужска можо), «Мобильное приложение «Система оповещений – 112»» (Красноярска хизаар); «Пожарный мониторинг социально значимых объектов на базе ЕРИП АПК БГ» (Буряад Улас) гэһэн гурбан түсэл ороһон байна.

Хоёрдохи һуури Красноярска хизаарай түсэл эзэлээ, гурбадахи һуурида - Калужска можын түсэл.

Бүхыдөө мүрысөөндэ 251 мэдүүлгэ ороһон байна. Түгэсхэлэй шатада 50 түсэл хабаадаа.