​«Алдар Цыденжапов» корведэй экипаж: «Баатарай нэрээр омогорхон, дээрэ үргэн ябанабди»

2018 онһоо хойшо Буряад Уласта жэл бүри сентябриин 24-дэ, Ородой Холбоото Уласай Герой Алдар Цыденжаповай баатаршалгын үдэр, дурасхаалай митинг үнгэргэгдэг. Нютагаймнай хүбүүнэй баатаршалга гаргаһан сагһаа хойшо 11 жэл үнгэрөө.

 Дурасхаалай хэмжээ ябуулгада Сэрэгэй-далайн флодой сэрэгшэд, «Алдар Цыденжапов» корведэй экипаж ерэһэн байна.

- 2015 оной июлиин 22-то Амурай судостроительна заводто корвет баригдажа эхилээ, 2019 оной октябриин 21-дэ тэрэ уһанда табигдаа. Бидэнэй урда ехэ харюусалга – Алдар Цыденжаповай баатаршалга халан абагшад гээшэбди. Баатарай нэрээр омогорхон, дээрэ үргэн ябанабди, - гэжэ «Алдар Цыденжапов» корведэй командирай орлогшо, капитан-лейтенант Дмитрий Шеметов сугларагшадта хандаба.

Дурасхаалай хэмжээ ябуулгада хабаадагшад Алдар Цыденжаповай хүшөөдэ баглаа сэсэгүүдые табиба. Буряад Уласай Засагай газарай, Алдар Цыденжаповай дурасхаал мүнхэлхэ талаар жасын, «Боевое братство» эмхиин уласай таһагай гэшүүд, эдир армейцүүд болон волонтёрнууд Ородой Холбоото Уласай Геройе дурсаба.

- Тэрэ һайн абари зантай хүн байгаа, иимэ баатаршалга гаргахын түлөө эрэлхэг зүрхэтэй байхаһаа гадна, нигүүлэсхы зантай байха хэрэгтэй. Тэрэ ами наһаяа гамнангүй, олон хүнүүдые абараа. Агууехэ хүн болоно. Ганса номууд соо баатаршалга гаргагдана бэшэ. Энэ бидэндэ жэшээ болоно. Би баһал туһатай хүн болохо хүсэлтэйб, тиимэһээ волонтёр болонхойб, - гэжэ Буряадай «Боевое братство» эмхиин волонтернуудай ротодо хабаадагша Кира Сидельникова хэлэбэ.

- Бидэ ургахабди, бидэниие һэлгэхэ халаан урган гараха, харин Алдарай баатаршалга хэтэ мүнхэ. Баатаршалга мартагдадаггүй. Волонтёрнуудай ротодо бидэ музейнүүдээр ябадагбди, түүхэ байгуулһан хүнүүд тухай мэдэхэ дуратайб. Бидэндэ «Алдар» гэһэн спектакль харуулаа, тэндэ һүүлэй секунданууд тоологдожо, Алдарай шиидхэбэри абаһан тухай харуулагдаа. Энэ тон шухала үйлэ, һүрөөтэй. Мүнөө иимэ ушарта ороһон хүнүүд ямар шиидхэбэри абахаар байгааб гэжэ бодомжолхоор. Харин Алдар хүнүүдые абарха гэһэн шиидхэбэри абаа. Энэ баатаршалга хэтэ мүнхэдэ үлэхэ ёһотой, - «Боевое братство» эмхиин волонтернуудай ротодо хабаадагша Иван Усольцев хэлэбэ.

Тэгшэ 11 жэлэй саана, 2010 оной сентябриин 24-дэ, «Быстрый» эсминецэй бүхы экипаж Фокиноһоо Камчатка гарахаяа бэлдэжэ байгаа. Кораблиин машинна таһагта түймэр гаража, котельнэ командын машинистын тушаалда дежурна байһан Алдар түлишын гараһан газарта түймэр усадхахаяа дары ошоо. Оройдоол юһэн секундын туршада тэрэ гал дүлэн соо байһанаа, өөрөө гаража, ехэ гэгшээр шатаһан байна. Алдарай болон тэрэнэй алба суг хаадаг нүхэдэй оролдолгоор ехэ гэнэ усал усадхагдаа. Эсминец дээрэ 300-гаад хүн байгаа.

Ехээр гэмэлтэһэн Алдарые Владивосток хотын Номгон далайн флодой госпитальда асараа. Дүрбэн үдэрэй туршада тэрэнэй ами наһа абарха гэжэ эмшэд оролдоо. Теэд 2010 оной сентябриин 28-да тэрэ наһа бараа һэн. Алдар хүбүүндэ һараһаа бага болзорто алба хааха үлэһэн байгаа.