​Буряад Улас Москва хотодо аяншалгын һалбарида инвестициин арга боломжонуудтаяа танилсуулха

Мүнөөдэр, сентябриин 28-да, Москва хотодо «Потенциал развития объектов туризма в макрорегионе Байкал» гэһэн инвестициин үдэр үнгэргэгдэхэ. Энэ хадаа Буряад Уласай болон Эрхүү можын аяншалгын һалбарида федеральна хэмжээнэй инвесторнуудай һонирхол татаха талаар Сбербанк болон Ростуризмтай суг эмхидхэгдэһэн хэмжээ ябуулга болоно.  

Сбербанкын талмайда эмхидхэгдэхэ road show гэһэн хэмжээ ябуулгада Сбербанк бүлгэмэй правлениин хүтэлбэрилэгшэ, юрэнхылэгшэ Герман Греф, Буряадай Толгойлогшо Алексей Цыденов, Эрхүү можын амбан захирагша Игорь Кобзев, Аяншалгын талаар федеральна агентствын хүтэлбэрилэгшын орлогшо Елена Лысенкова гэгшэд хабаадаха.

Аяншалгын инфраструктура хүгжөөхэ талаар можо нютагуудай инвестициин арга боломжонуудтай танилсуулжа, зошод буудал, аяншалгын комплекснуудые, инфраструктурна объектнүүдые байгуулха талаар талмайнуудтай танилсуулха. Тэдэниие байгуулбал, Байгал ошоһон аяншалагшад һайн шанартайгаар амарха, тиихэдэ ашаг үрэтэй инвестициин хүрэнгэ оруулагдаха болоно.

Айлшадые угтан абалгын болон гэр байрын, зошод буудалай һалбариин 100-һаа дээшэ инвесторнууд, инвестициин жасанууд, консалтингова компанинууд болон олон һалбаритай инвестициин бүлэгүүдэй түлөөлэгшэд уригданхай. Байгалай можо нютагай оршонтой танилсажа, аяншалгын һалбарида түсэлнүүдые бэелүүлхэ талаар һонирхолтой хүнүүдтэ программа бэлдэгдэнхэй. Тэдэнэр мүнгэ хүрэнгэ оруулха һонирхолтой шэглэлнүүд, инфраструктура хүгжөөхэ түсэбүүд болон инвесторнуудые дэмжэхэ механизмуудтай танилсаха.

Суг ажал ябуулха тухай хэлсээ Аяншалгын талаар федеральна агентство, Буряад Улас болон Эрхүү можо үнгэрһэн жэлдэ баталагда гэжэ һануулнабди. Аяншалгын һалбариин түсэлнүүдэй инвестициин дэмжэлгэ үзүүлхэ, тэрэ тоодо, федеральна дэмжэлгэ үзүүлхэ талаар абтаһан хэмжээнүүдтэй хамта, тухай хэлсээн «Сбербанк» бүлгэмтэй баталагдаа һэн.

Москва хото, Кутузовский проспект, 32 корп. Е (32к1) гэһэн хаягаар хэмжээ ябуулга үдэрэй 16 сагта үнгэргэгдэхэ.

Хэмжээ ябуулгада оролсохо гэбэл, Буряад Уласай Засагай газарай мэдээсэлэй албанда [email protected] гэһэн сахим хаягаар дансануудаа эльгээжэ, 8 (3012) 213 315 гэһэн утаһаар хандажа болоно.

ШУХАЛА: хэмжээ ябуулгада хабаадаха гэбэл, тарилга абаһан тухай үнэмшэлгэ (12 һарын туршада тэрэнь үнэн) гү, али үбшэлһэнэй удаа 6 һарын туршада антитела байһан тухай үнэмшэлгэ, али ПЦР-тест (10 үдэр) байха ёһотой.