​Уһанда абтаһан газар дэбисхэр Буряадта дахин шалгаха

Байгша оной зун уһанда абтаһан газарнууд дахин шалгагдаха. Уһанһаа хэды айл хохидооб гэжэ тодорхойлогдохо зорилготойгоор энэ ажал ябуулагдана. Энээн тухай зохихо шиидхэбэри сентябриин 27-до уласай онсо байдал һэргылхэ болон хойшолонгуудые усадхаха болон түймэрэй аюулгүй байдал хангаха талаар комисси абаһан байна.

- Неделиин дүүрэтэр гэрнүүдые шалгаха ёһотойбди. Нэгэшье гэр шалгагдангүй үлэхэ ёһогүй. Мүнөөдэр Улаан-Үдэдэ уһанда абтаһан газарнуудаар ябажа эхилхэбди. Аймагуудта һомонуудай хүтэлбэрилэгшэд уһанда абтаһан газарнуудые дахин шалгаха ажал хиналта дороо абыт даа, - гэжэ Буряад Уласай Засагай газарай Түрүүлэгшын орлогшо Петр Мордовской комиссиин суглаанда хэлэбэ.

Гэхэтэй хамта, Ивалгын аймагта нэмэлтэ 1,5 сая түхэриг һомолхо тухай шиидхэбэри абтаа. Уһанһаа хохидоһон аймагай 105 ажаһуугшада 10-10 мянган түхэригэй нэгэ доро түлэгдэхэ тэдхэмжэдэ энэ мүнгэн шэглүүлэгдэхэ.