​Богоһоо алхаад, богоо хаяхамнай гү?

Улаан-Үдэ хотомнай нобшо ноохойдоо дарагдан үлэхэеэ байнагүй гү? Доодо Саянта нютагай дэбисхэртэ оршодог нобшо ноохойн полигон ерэхэ жэлэй май һарада хаагдахань гэжэ хэлэгдээ. Хажуудань үшөө нэгэ бог хадагалха газар бэлдэхэ гэхэдэнь, Росавиациин шэнэ тогтоол хүсэндөө орохонь.

Росавиациин шэнэ тогтоолой ёһоор, аэропорт тойроод, арбан табан километрэй зайда ямаршье байшангууд, ажамидаралай хото хорёонууд баригдаха ёһогүй. Тиигэжэ мүнөө сагта нобшо суглуулдаг, мүн шэнээр түхеэрэгдэжэ байһан полигонууд тэрэ арбан табан километртэнь ороно. Харин бүри холо болгожо бариха гэхэдэ, бусад аймагууд газар дэбисхэр дээрээ тиимэ полигон хэхэеэ арсана. Тэдэниие ойлгохоор. Харин түргэн саг соо энэ асуудал шиидхээгүй һаа, хотомнай болон хотые тойроод байһан модон гэрнүүд нобшодоо дарагдажа, эндэ тэндэ бог шорой хаялган эхилхэ, саашадаа тэрээндээ дарагдажа эхилхэбди. Хотын һунгамалнууд энэ бэрхэшээл тон һайн ойлгоно. Тиимэһээ тус асуудалда һонирхол татаһан эмхи зургаануудые суглуулжа, 
суглаа зарлаа. 

Улаан-Үдэ хотын Һунгамалнуудай зүблэлэй түрүүлэгшэ Чимит Бальжинимаевай хэлэһээр, нобшо суглуулха шэнэ газар олохо хэрэгтэй. Сэхыень хэлэбэл, энэ ехэ хүндэ асуудал. Экологическа экспертизэ гараха хэрэгтэй болоно.

Буряадай байгаалиин нөөсэнүүдэй болон экологиин сайдай орлогшо Наталья Тумуреевагай хэлэһээр, энэ асуудал үшөө 2011 ондо зүбшэн хэлсэгдэжэ эхилһэн байгаа. Теэд тэрэ сагһаа хойшо ажал бүтэжэ ядаа. Тодорхойлбол, Буряад Уластамнай саарһа дансатай, зүбшөөлтэй нобшо ноохойн полигон гансал Гусиноозёрск хотын хажууда байрланхай. Харин тиишэнь богоо шэрэхэ болобол, арад зонһоо түлбэринь хэды дахин ургаха гээд, “ЭкоАльянс” эмхиин түлөөлэгшэ хэлээ. Юрэдөө, энэ асуудалай түргэн шиидхэгдэхэнь бэрхэшээлтэй юм. Хотын һунгамалнууд Буряадай засагай газарайхид болон федеральна ноёд һайд туһалсаха бэзэ гэжэ найдана.