​Буряад Уласта ниигэмэй 446 объект интернедтэй болохо

«Цифровая экономика» гэһэн үндэһэн түсэлэй түгэсхэлэй шата Буряад Уласта «Ростелеком» болзорһоо урид бэелүүлбэ. Тиигэжэ уласай ниигэмэй 446 объектнүүд интернедтэй болобо: һургуули, фельдшерскэ пунктнууд, онсо байдалай талаар яаманай болон Росгвардиин таһагууд, соёлой эмхинүүд, пожарна таһагууд болон һомонуудай захиргаанууд.  Октябрь һарада эдэ эмхинүүд интернедтэй болохо.

«Цифровая экономика» гэһэн үндэһэн түсэл уласай аймагууд болон хотын хоорондо цифровой байдал тэгшэлхэ талаар туһатай. Буряад Уласта энэ түсэл гурбан жэлэй туршада бэелүүлэгдэнэ. Программын бэелүүлэгдэжэ эхилһэн 2019 ондо «Ростелеком» уласай аймагуудта 163 км волоконно-оптическэ утаһа татажа, 278 эмхинүүдтэ интернет оруулагдаа. Үнгэрһэн жэлдэ 400 км оптико татагдажа, 342 ниигэмэй эмхи интернедтэй болоо.

- Интернедтэй болоһон ниигэмэй 1 066 эмхинүүдэй 95 хубинь хүдөө нютагуудта хүдэлдэг. Оптическэ утаһанууд найдамтай холбоо байгуулна. Интернедэй ашаар ажал эршэдүүлэгдэжэ, онлайн-һуралсал, зүблөөнүүд, холоһоо туһаламжа үзүүлэгдэхэ аргатай. Тиигэжэ холо оршодог нютагууд ниигэмэй эмхинүүдэй ажалай шанар дээшэлүүлэгдэхэ, - гэжэ Буряадай Толгойлогшо Алексей Цыденов тэмдэглэбэ.

Мүнөө барилгын ажал болон тоног хэрэгсэл тодхохо талаар ажал дүүрэнхэй, шэнэ объектнүүдые интернедтэй болохоор бэлэн.

- Байгша ондо ехэ ажал хэгдээ, 750 км опто-волокно татагдаа. Тэдэнэй 135 км - Сэлэнгын аймагта, 73 км - Муяын аймагта, 66 км - Хойто Байгалай аймагта.  Телекоммуникационно инфраструктурын хүгжэхэдэ, хурдан интернет, мобильна холбоо болон цифровой телевидени хүгжөөхэ талаар техническэ бааза байгуулагдана, - гэжэ «Ростелеком» бүлгэмэй Буряадай таһагай захирал Андрей Здаров хэлэбэ.