​Буряад хэлэнэй үдэрнүүд

Заншалта ёһоор октябрьта «Буряад хэлэнэй габшагай һара» соносхогдодог. Халдабарита ковид үбшэнһөө боложо, үхибүүдэй хабаадалгатай олон хэмжээ ябуулганууд энэ удаа онлайн аргаар үнгэрхэ.

Болбосоролой болон эрдэм ухаанай, Соёлой яаманууд олонхи хэмжээ ябуулгануудые даажа абанхай. Улас доторой дунда һургуулинуудта буряад хэлэндэ зорюулагдаһан хэшээлнүүд, викторинанууд, урилдаанууд үнгэрхэ байна. Дээдэ болон дунда мэргэжэлэй һуралсалай гуламтануудта буряад хэлэндэ зорюулагдаһан хэмжээ ябуулганууд хараалагданхай. Жэшээлхэдэ, Уласай багшанарай колледждо «Эрдэм бэлигэй дээжэ» гэһэн ухаан бодолой урилдаан үнгэрхэ. Доржи Банзаровай нэрэмжэтэ Буряадай дээдэ һургуулида «Урасхал ехэ уһан мэтээр урдажа байна үе саг» гэһэн сэдэбээр регион хоорондын хэмжээндэ найруулга бэшэлгэ үнгэрхэ. Эндэ 10-11- дэхи ангинуудай һурагшад хабаадаха юм. Аймагуудаар баһал найруулгануудые болон диктант бэшэлгэн түсэблэгдэнхэй. Дондог Улзытуевай 85 жэлэй ойдо зорюулагдаһан “Ая гангын орон” гэжэ нэрэтэй ухаан бэлигэй урилдаан, Даширабдан Батожабайн 100 жэлдэ зорюулагдаһан хэмжээ ябуулганууд үнгэрхэ. Соёлой һалбарида Буряадай үндэһэтэнэй дуу, хатарай “Байгал” театр урданай дуунуудаар концерт бэлдэнхэй. “Буряад хэлэнэй габшагай һарын” үдэрнүүд октябриин 29- дэ Хоца Намсараевай нэрэмжэтэ Буряадай театрта ехэхэн тоглолтоор дүүрэхэ байна.