​«Бэлигэй толи» уудалһан урилдаан Буряадта соносхогдоо

Эрдэни-Хайбзан Галшиевай “Бэлигэй толи” зохёолой удхаар буряад хэлэн дээрэ эссе зохёохо урилдаа Буддын шажанай заншалта Сангха Буряад Уласай Соёлой яамантай болон “Алтан гэрэл” жасатай хамта эмхидхэнэ. Энэ урилдаанда 16-һаа дээшэ наһанай хэншье оролсохо аргатай юм. Доро дурадхагдаһан дүрбэн мүртэй 2 бадагуудһаа алибааень шэлэжэ, тэрээн дээрэ үндэһэлэн, эссе найруулаад, жюриин сэгнэлтэдэ эльгээхэ хэрэгтэй.

Бусад сагай үедэ бэе, 

Баһа хубсаһа болониие һайнаар угаа.

Тэрэниинь хүнэй номой ёһололдо

Арюун сэбэрнүүдэй эдлэл мүн.

(“Бэлигэй толи”, 2020 он)

Хүн хэншье мүн гээшэ һаа,

Ухаан эрдэмдэ һуралса.

Тэрэ хадаа эдтэй адли буянда дулдыдаха бэшэ,

Өөрын хүсэндэ дулдыдаха.

 (“Бэлигэй толи”, 2017 он)

 Илагшадта дипломууд, мүнгэн бэлэг болон Эрдэни-Хайбзан Галшиевай “Бэлигэй толи” ном барюулагдаха. Кафе «Грильяж», Валентина болон Жаргал Ивановтоной Санкт-Петербург хотын мастерской энэ урилдаа эбээн тэдхэлсэнэ.

Байгша оной октябриин 20 болотор konkurs214124@ mail.ru гэһэн хаягаар мэдүүлгэнүүдээ эльгээжэ болоно. Энэ урилдаан тухай бүри дэлгэрэнгы мэдээ иимэ утаһануудаар абажа болоно:

83012214124; 89246556817 Цыбикова Светлана Цыденбаловна

89149873140 Босхолова Туяна Будажаповна

89149845378 Очирова Светлана Александровна

Дооромбо ламын намтарһаа:

Эрдэни-Хайбзан Галшиев 1855 ондо Хэжэнгын аймагта түрэһэн юм. Эдир залуудаа Түбэд ошожо, мэдээжэ Брэйбун дасанай Гоманда һуралсал гараһан. 16 жэлэй туршада буддын шажанай ном шудалжа, дооромбо гэһэн үндэр зиндаатай болоһон.

42 наһатайдаа нютагаа, Хэжэнгынгээ дасан бусаа. Лама санаартанай соморхон байдалтай, харилсахада зохид байһан гээд, олонхи зон ажаглаһан. Ямарханшье ехэ эд зөөритэй, үндэр тушаалтайшье һаа, хүн бүхэн – эхэ байгаалиин үри ха юм гэжэ хэлэдэг һэн ха. Түрэһэн нютагтаа ехэ дуратай байһан.

Буддын шажанай гүн ухаа наринаар шэнжэлһэн эрдэм ехэтэй лама найруулгануудые бэшэдэг байһан. Тон удха шанартай хүдэлмэринь гэхэдэ, “Бэлигэй толи” болоно. Тэрээн соо ажабайдалдаа хэрэглэмэ мэргэн зүбшэлнүүд суглуулан найруулагданхай.

18 жэлдэ дооромбо лама дасандаа алба хээд, 1915 оной июниин 26-да 60 наһандаа тагаалал болоһон.