344
Эрхүү можын Усть-Орда тосхондо ажаһуугшадай хэрэглэхэ сэбэр, шанар һайтай уһанай асуудал жэлһээ жэлдэ тобойн гарадаг. Усть-Ордын тойрогой захиргаанай хүтэлбэрилэгшэ Анатолий Прокопьевой үүсхэлээр хүндүүлхэй асуудал шиидхэгдэхэ тээшээ болохонь.
Эдэ үдэрнүүдтэ үнгэргэгдэһэн суглаанай дүнгөөр байгша оной декабрьта уһаар хангаха эмхитэй хэлсээн баталагдаха ёһотой. Тиин «Окружные коммунальные системы» гэһэн хизаарлагдамал харюусалгатай бүлгэмдэ олон дабхартай гэрнүүдые, социальна объектнүүдые шанар һайтай уһаар хангахаһаа гадна, үмсын гэрнүүдые уһатай болгохо талаар ажал ябуулхыень дурадхагдаба. Тосхон дотор дүн хамта 7,5 км утатай уһанай сорго баригдахаар хараалагдана. Тиихэдэ Эхирэд-Булагадай аймагта 616 һууритай һургуулиин барилга эхилхэ юм. Тус объектые мүн лэ уһаар хангаха түсэб табигдаба. Энэ түсэлэй урагшатай бэелүүлэгдэбэл, үхибүүдэй 3 сэсэрлиг уһатай болохо.
Автор: Янжима ДАРМАЕВА бэлдэбэ
Фото: pixabay.com
