​Агын Буряадай тойрогто «Хорхогой наадан» эмхидхэгдээ

Агын Буряадай тойрогой «Кочевник» этнобаазын дэргэдэ хорхог шанаба. Хониной мяхаар бэлдэгдэһэн эдеэ хоолой фестиваль Онон голой эрьедэ анха түрүүшынхиеэ үнгэргэгдэжэ, олоной һонирхол татаа гээд эли. Тойрогой 3 аймагай түлөөлэгшэд Агын буряадуудай эдеэ хоолой ёһо заншал эндэ дүүрэн харуулаа.

Хэмжээ ябуулга нээлгын ёһололой удаа хабаадагшад хони хайшан гэжэ зүб мүрөөр гаргахаб, дотороорнь ямар эдеэ хоол буйлуулдаг гээшэб, хорхог яажа шанахаб гэжэ айлшадта, жюриин гэшүүдтэ харуулаа. 3 часай туршада үргэлжэлһэн конкурсдо Дулдаргын аймагай Аюр, Цыцыгма Цыдендоржиевтан фестивалиин гол шанда хүртэбэ. Хониной мяхаар, дотороорнь бэлдэһэн эдеэ хоол, хорхог амтатайгаар бэлдэхэһээ гадна, Цыдендоржиевтан аарса халаажа, сугларагшадые хүндэлөө. Могойтын аймагай Дарма Ринчинов Сэсэгма нүхэртэеэ 2-дохи һуури, Ага тосхоной Жаргал, Саянэ Жалсандоржиевтан, Хүнхэрэй Амгалан, Билигма Эрдынеевтэн шангай 3-дахи һуури эзэлээ юм. Фестивальда мастерклассууд үнгэргэгдөө. Айлшад бууза хумижа, шагай наадажа, нооһоор бүтээлнүүдые хэжэ туршаа. Һээр шаалган, һур харбаан, «Амар сайн» театрай тоглолто хэмжээ ябуулганиие шэмэглээ. «Хорхогой наадан» гэжэ нэрлэгдэһэн фестиваль – конкурс саашадаа заншалта болохо юм.