​Эпидемитэй тэмсэһэн хэмжээнүүд сахигдана гү гэһэн шалгалта Буряадта үнгэргэгдэһөөр

Үнгэрһэн сүүдхын туршада улас дотор 600-һаа дээшэ эмхинүүд шалгагдаа. Һэргылэмжын хэмжээнүүдые хазагайруулһан тухай захиргаанай 120 протокол абтаа.

Гэхэтэй хамта, ниитын унаада һэргылэмжын хэмжээнүүд сахигдана гү гэжэ шалгалгагдана. Буряад Уласай Транспортын яаманай мобильна бүлэг ГИБДД-н хүтэлбэритэй хамта аймагууд хоорондын 9 автобус шалгажа, 180 пассажирнуудтай хөөрэлдөөнүүдые үнгэргөө. Ама, хамараа бүглөөд ябаха эрилтэ дүүргээгүй нэгэ хүндэ протокол абтаа.

- Үдэрһөө үдэртэ улас дотор COVID-19 үбшэнэй һүжэрхэ ушар орёо болоно. Тиимэһээ олзын хэрэг эрхилэгшэд, эмхинүүдэй хүтэлбэрилэгшэд һэргылэмжын хэмжэнүүдые сахина гү шалгахын тула мобильна бүлэгүүдэй ажал эршэдүүлэгдээ. Коронавирустай тэмсэхэ уласай оперативна штабай суглаанда Буряадай Толгойлогшо Алексей Самбуевич нэн түрүүн COVID-19 үбшэнһөө һэргылһэн тарилга абанхай тон үсөөн хүдэлмэрилэгшэдтэй эмхинүүдые шалгаха гэжэ даалгаа. Үшөө дахин нютагаархидаа вакцинаци гарахыень, хүдэлмэрилэгшэдөө тарюулхыень, санитарна-противоэпидемическэ эрилтэнүүдые сахихыень уряалнабди.  Дүрбэдэхи долгин болохо гэжэ хүлеэгдэнэ, тиимэһээ һэргылэмжын бүхы хэмжээнүүдые сахин, өөрынгөө, дүтынгөө хүнүүдэй элүүр энхые хамгаалхабди, - гэжэ Буряад Уласай Засагай газарай Түрүүлэгшын орлогшо, оперативна штабай хүтэлбэрилэгшэ Пётр Мордовской хэлэбэ.

Бүхыдөө улас дотор үдэр бүри 75 мобильна бүлэгүүд хүдэлнэ. Тэдэнэй бүридэлдэ гүрэнэй, аймагуудай алба хаагшад, полициин, түймэр саралгын болон эпидемиологическа албанай 200 тухай хүдэлмэрилэгшэд ороно.

Ковидна эрилтэнүүдые сахидаггүй хүнүүдтэ яла тохогдохо гэжэ һануулнабди: эрхэтэдтэ – 1,5 мянган түхэриг хүрэтэр; тушаалта нюурнуудта – 7,5 мянган түхэриг хүрэтэр, юридическэ нюурнууд – 25 мянган түхэри хүрэтэр.

Дүрим дахинаа эбдэһэн зондо яла бүри дээшэлхэ: эрхэтэд – 4 мянган түхэриг хүрэтэр; тушаалта нюурнууд – 20 мянган түхэриг хүрэтэр, юридическэ нюурнууд – 80 мянган түхэриг хүрэтэр.