​Эсэгэ ороноо хамгаалгын Агууехэ дайнда хабаадагшадта хүшөө Буряадай Балта нютагта бодхоогдохо

Буряад Уласай Мухар-Шэбэрэй аймагай Балта нютагта Эсэгэ ороноо хамгаалгын Агууехэ дайнда хабаадагшадта хүшөө бодхоогдохо. Буянтай хэрэг «Черёмушки» ТОС-ой эдэбхитэд үүсхэбэ.

- Байгша ондо 57 мянга 350 түхэриг суглараа: түмэр суглуулжа, тэрэнээ тушаажа 40 мянга ороо, 17350 мянгыень нигүүлэсхы сэдьхэлтэй хүнүүд суглуулаа. Үнгэрһэн жэлэй грантын мүнгөөр 2022 оной хабар ажал эхилхэ гэжэ барилгын хэрэгсэлнүүд абтаа, - гэжэ эдэбхитэд мэдүүлнэ.

2021 ондо барилгын хэрэгсэлнүүдые худалдан абалгада 50 мянган тухай түхэриг гаргашалагдаа, 2020 ондо хүшөө хоройлхо хэрэгсэлдэ 123 мянган түхэрг дамжуулагдаа.

Мүнөө хүшөөгэй бодохо газарта Илалтын парк байгуулха зорилготойгоор газар сэхэлэгдэжэ хоройлогдоо, модохонууд таригдаа, хүшөө тодхохо талаар хэрэгсэлнүүд бэлдэгдээ.

- Эсэгэ ороноо хамгаалгын Агууехэ дайнда хабаадагшадай нэрэнүүдые бүридхэхэ талаар нарин ажал ябуулагдана, - гээд, Балта нютагай эдэбхитэд тэмдэглэнэ.

- «Хэншье, юуншье мартагдаагүй» гэһэн уряа доро «Черёмушки» ТОС ажалаа энэ зун эрхилээ. Балта нютагта Эсэгын дайнда хабаадагшадта зорюулагдаһан хүшөө үгы. Тиимэһээ үбгэ эсэгэнэрэйнгээ нэрыень мүнхэрүүлжэ, ашыень харюулха гэжэ манай ТОС шиидэһэн байна. Һурагшад энэ ажалдамнай эдэбхитэй хабаадаа, минии һанахада, ургажа ябаа улаан бургааһадаа Эхэ нютагтаа дуратайгаар, ажабайдалда эдэбхитэйгээр хүмүүжүүлхэ гээшэ тон шухала», - гэжэ «Черёмушки» ТОС-ой түрүүлэгшэ Юлия Ендонова хэлэбэ.