​Дэлгэрүүлхэ хэрэг дэлисэтэй гү?

Олзын хэрэг эрхилэлгын дэлгэрэл, ородоор хэлэбэл, сетевой бизнес, ерээдүй сагай олзо оршо ололгын хэрэг гээд, олон газарнуудаар дуулагдаһан байна. Энэ олзын хэрэгэй һая дэлгэржэ байгаа сагта үйлсэ гудамжануудаар гү, али эндэ тэндэ ябахада, элдэбын эм домто витаминуудые, шэг шарай һайхан болгодог хэрэгсэлнүүдые худалдан абагты гэжэ бааладаг зон ябагша бэлэй. Мүнөө сагта Интернедэй хүсэ шадал нэмэжэ, тэдэ зомнай бүхэдэлхэйе бүһэлһэн “шүлһэндэ” оронхойнууд, тэндэ ажалаа ябуулна. Энэ ушараар бидэ хотынгөө ажаһуугшадһаа олзын хэрэг эрхилэлгын дэлгэрэл тухай асуужа, ажамидаралайнгаа алта мүнгэ олохоор гээшэ гү гэжэ һонирхоһон байнабди.

5-дахи шатын гагнууршан Юрий Урбагаров:

- Би юрэдөө сетевой хэрэг эрхилэлгэдэ үнэншэдэггүйб. Минии һанахада, тэрэ дурадхаһан продукцинь айхабтар үнэтэй, шанар шэнжын талаараа һайн байгаашье һаа, һара бүри үнэтэйгөөр худалдажа абахань гарзатай. Гадна хажуудаа зониие дуудажа асараад, тархи толгойень нүгөө тээшэнь эрьюулжэ, хэжэ байһан ажалһаань болюулаад, зэмэтэй болохош. Намда хэды олон зон энэ хэрэгтэ оролсо, бэлээр үгэдэш орохо хүн олдохо гэжэ байгаад зууршалаа юм. Теэд нүхэдөө гомдохоохогүйн тула түрүүшээр продукцииень абадаг байгааб. Шанар шэнжын талаар тиимэшье ехэ илгаа хараагүйб. Харин үнэ сэнгэй талаар илгаа ехэхэн байгаа. Заншалта хэдэг ажалаа хээд, гүрэндөө татабарияа түлөөд, ехэ багашье һаань, салингаа абаад, дадаад ябаха хубитай гээшэлби даа. Зоной толгой эрьюулхэ һанал бодол сэдьхэлдэмни орой үгы.

Саян Раднаев, “Тэмүджин” бүлэгэй дуушан:

- Олзын хэрэг эрхилэлгын дэлгэрэлдэ тиимэшье ехэ найдал үгыб. Эндэ тэндэ нүхэдэйнгөө хандалгаар продукцииень абажа хэрэглэдэгби. Шанараараа һайн байгша, харин бага зэргэ үнэтэй гээд һанагшаб даа. Гол ажалтай хадаа энээндэ дан тиимэ анхарал табигданагүй хаш даа. Минии нэгэ хэды танил зон ганса энээгээр ажал хээд, яһала олзо оршотой ябаһан шэнги байха, теэд урьһаар мүнгэ һурахадаш, ходол мүнгэн бага гэжэ хэлэгшэ. Мүнгэниинь тэрэ хэрэг соогоо эрьелдэжэ байгаа юм ааб даа. “Амвей”, “Атоми”, “Гринвэй” гэхэ мэтэ дэлгэрэлнүүд шэхэндэ дуулдаһан байдаг. Хүн бүхэн яагаад мүнгэ олохоёо өөһэдөө мэдээ юм бэзэ. Мүнгэнһөө үнэр гутадаггүй гэжэ хэлэдэг (энеэнэ).

Соёлма Сангажапова, олзын хэрэг эрхилэгшэ:

- Би иимэ олзын хэрэгтэ үнэншэдэггүй байгааб. Олон жэлэй туршада БГУ-да багшалаад, хожомынь Буряадай Болбосоролой болон эрдэм ухаанай яаманда ажаллааб. Теэд хуби заяанай харгыда һайн зон тудалдажа, одоошье сетевой бизнес тухай хөөрэжэ, ойлгуулжа үгэһэн байна. Минии ороһон дэлгэрэл Урда Солонгосһоо эхиеэ абана. Булта мэдэнэ гээшэбди, Солонгосой арад зон өөрын бэе махабадтаа ехэ наринаар, гамтайгаар хандадаг. Дэлхэйн олон зон тиишээ арга абахаяа ошодог. Сэхыень хэлэхэдэ, түрүүшээр ухаан бодолни тад ондоогоор ухамайлжа байһан аад, сагай ошохо бүри, одоо нэгэ-хоёр һарын туршада яаманда ажалладаг байха үеынгөө салинһаа гурба дахин ехээр абахадаа, гайхаа бэлэйб. Жэл болохогүй хугасаа соо ажаллажа байгаад, салин абанаб, жэлдээ хоёр дахин дэлхэйгээр аяншалха аргатай болоод байнаб. Теэд эндэмнай баһал ажаллаха хэрэгтэй. Тиимэ бэлэн бэшэ. Амжалтатай хүдэлхэ гэбэл, һайн мүнгэ абахаяа һанабал, унаһан малгайгаа абангүй, өөрын бүлэг команда суглуулха хэрэгтэй. Тэдэтнай һайн ажаллабал, танай хармаанда нэмэри орожол байха. Тобшолон хэлэбэл, олзын хэрэг эрхилхэ дэлгэрэлдэ ажаллажа боломоор.

Егор Эрдыниев, сэрэгэй алба хаагша:

- Юрэдөө, тиимэ олзын хэрэг тухай дуулаһан байнаб. Харин тэрээгээр олзо оршо хэхэ гэжэ бодолгото болоогүйб. Юуб гэбэл, өөрын ажалтайб. Сэрэгэй албанда жолоошоноор хүдэлнэб. Салин хүлһэн тиимэшье ядуу бэшэ. Ажамидаралдам хүрэнэ. Минии таниха, мэдэхэ зон энэ сетевой бизнестэ һонирхолгүй байгша. Ажалгүй байгаа һаа, магад, һонирхожо байха һэн. Үшөө залуу, һая уялгата сэрэгэй албанһаа ерээд байхадам, “Орифлейм” гэжэ компанида танил басагад хүдэлэгшэ һэн. Каталог баряад ерэхэдэнь, һахалаа абаха хэрэгсэлнүүдые нэгэ-хоёр дахин захигша бэлэйб. “Амвей” компани шэхэндэм үнинэй. Минии түрэлэйхид дундаа хөөрэлдэжэ байдаг һэн. Мүнөө дуулдахаяашье болёо.

Үсөөхэн лэ зон олзын хэрэг эрхилэлгын дэлгэрэлдэ найдамтай байна. Олониинь заншалта аргаар мүнгэ алта олобол, дээрэ гэжэ һанана. Зариман тэндэ бэлээр мүнгэ хэхэб гэжэ һанаад ородог. Теэд ажалай ехэ байһандань болижо, урмаа хухарһан зон бии. Олон зон энэ бизнес мүнгэ алтанай пирамидатай худхадаг байна. Хүн бүхэн ямар ажал хэжэ, алта мүнгэеэ олохоёо өөһэдөө шэлэнэ ха юм.