«Талын ехэ наадан»

Агын тойрогой Үндэһэтэнэй дуу, хатарай “Амар сайн” театр һаяхан зохёохы шэнэ бүтээл арад зондоо харуулба.

“Талын ехэ наадан” гэжэ нэрэтэй зүжэглэмэл тоглолто театр үзэгшэд халуун альга ташалгаар угтан абаһан байна. Мүнөөдэрэй эрилтын гуримаар нэгэ һуури алгасаад, харагшад һуугаа һэн. Дулдаргаһаа, Могойтоһоо, дүтын һууринуудһаа ерэһэн театрта дуратайшуул тоглолтын түгэсхэлдэ “Гоё!”, “Браво!” гэжэ зүрхөө хөөрэн үгэлэн байхадань, артистнууд ямар ехээр баярлана гээшэб!

“Талын ехэ наадан” хүгжэмтэ зүжэгтэ зунай эхиндэ зүлгэ ногоон дээрэ боло­дог буряадуудай эрын гурбан наадан харуулагдаба. Бүхэ барилдаанда илагша бүхэндөө соло дуудалга, мэргэн харбагшаяа барлан дуулалга, хурдан мориёо магтан һайхашаалга гэхэ мэтэ буряадуудай ажабайдалые “Амар сайн” театрай артистнууд хүгжэм дуугаар зүжэглэн харуулаа юм.

“Талын ехэ наадан” зүжэг бүтээхэдэ, “Бага хотонуудай театрнууд” гэһэн гүрэнэй түсэлөөр мүнгэн һомологдоһон байна. Эрхүү можын амбан захирагшын шагналда хүртэһэн, Буряад Уласай соёлой габьяата хүдэлмэрилэгшэ Баира Аюрова зүжэг найруулан табяа юм. “Амар сайн” театрай уран һайханай хүтэлбэрилэгшэ, хореограф Доржо Аюров хатарнуудые зохёоһон байна.

“Амар сайн” театрай ажалшад бултадаа үүдэнһээ эхилээд, захирал хүрэтэрөө уриханаар угтан абадаг. Хүн бүхэниие “Амар сайн!” гэжэ мэндэшэлэн, мишэеэн энеэбхилжэ байдаг юм. Шэхэнэй шэмэг түрэл хүгжэмөө соносоходоо, нюдэ баясуулма хатар харахадаа, энэ хатуу шэрүүн сагта бидэнэр эльгээ дэбтэнэ, сэдьхэлдээ сог зали бадараана гээшэбди. «Амар сайн» театртаа баяр хүргэнэбди, амжалта хүсэнэбди!