594
Лариса Цымжитовна өөрын фейсбук хуудаһан дээрэ тэндэ хабаадаһан тухайгаа иигэжэ бэшэнэ:
- Энэ хэмжээ ябуулга ехэ удха шанартай. Олон үндэһэ яһатан манай гүрэндэ ажаһууна. Тэдэмнай өөрын түүхэтэй, уран зохёолтой, хэлэтэй гээшэ. Бидэ тэрэ урилдаанда буряад уран зохёолой эгээл шэмэ шүүһыень шэлэжэ абаад, түүхэтэйнь танилсуулаабди. Олоной һонирхол татамаар уран зохёолшодой, мүнөө үеын уран бэшээшэдэй бүтээлнүүдые, уран һайханаар буряад шүлэгүүдые уншажа байһан видео, эрдэмтэдэй шэнжэлһэн шухала ажалнуудай хэһэгүүдые болон буряад уран зохёол тухай лекци уншажа үгэһэн байгаабди. Бүхыдөө ехэхэн ажал ябуулагдаа. 100 гаран хабаадагшад энэ урилдаанда оролсоо. Бидэнэй ажалнууд «Дайджест литературы народов России» гэһэн согсолбори соо оролсохо болоо. Дипломууд үшөө ерээдүй байна, хүлеэжэ байнабди. Тус түсэл Россиин Юрэнхылэгшын тусхай шанда хүртэһэнэй ашаар бүтэбэ.
Автор: Эрдэни РАДНАЕВ
