Агаарай холбоо һэргээбэ

Эпидемиологическэ байдалай хүндэ болоһон ушарһаа 2020 оной март һарада Буряад оронһоо Монгол руу ниидэдэг  агаарай онгосонууд ажалаа тогтооһон байна гэжэ һануулая.

- Иимэ  удаан саг соо самолёдууд ниидэбэгүй. Монголһоо агаарай онгосын ниидэн ерэлгэ  ехэ удхатай хэрэг болоо. Тиигээдшье, энэ маршрудаар ниидэхэ зон олон байна. Мүнөө сагта гансал түмэр харгыгаар  болон автомобильна замаар ашаан  зөөгдэнэ ха юм. Харин мүнөө нээгдэһэн агаарай холбоон Буряадай болон Монгол ороной ажаһуугшадай хилэ дабаха нэгэл арга болобо  гээшэ, - гэжэ Буряадай Засаг газарай Түрүүлэгшын орлогшо Евгений Луковников тэмдэглэнэ. 

Агаарай  “Эмбраер 190” онгосо долоон хоногтоо нэгэ дахин ниидэжэ, 100-гаад пассажирнуудые зөөжэ байха юм. Биледэй сэн 11 мянган түхэриг шахуу байха.