Онсо журам сахигдаһаар

Хотын захиргаанай мэдээсэһээр, энэ хаһада ой руу орохонь хорюултай. Гэхэтэй хамта мэргэжэлтэ эмхиин ажалшад ойн түймэрнүүдһээ һэргылэмжын хүдэлмэри ябуулһаар. Тэрэнэй хажуугаар тэдэ модохонуудые тарина.

-Апрель, май һарануудта һалхитай байдаг һэн тула түймэр унтараахань ехэ орёо. Тиимэһээ хотын мэдэлэй болоод бэшэшье газарнуудта гал гаргажа огто болохогүй. Ой модоёо зон лэ шатаана, унтараангүй тамхияа хаяна, - гэжэ  Улаан-Үдэ хотын Онсо ушаралта байдалай хүтэлбэриин дарга  Валерий Вильдавский хэлэнэ.

Ой модо түймэрһөө харууһалха бүлгэмүүдтэ һайн дуратан, хотын захиргаанай, ойн ажахынуудай, Дотоодын хэрэгүүдэй яаманай болоод  бэшэшье эмхинүүдэй  мэргэжэлтэд туһа хүргэнэ. Журам эбдэгшэдые оньһото хэрэгсэлнүүд  мүн элирүүлнэ.
 Байгаалиин энгэртэ амарха дуратайшуулда тусхай  газарнууд бэлдэгдэнхэй- Комсомольско, Богородско олтирогууд, Дээдэ Онгостойн футбол наададаг талмай. Гадна амаралгын эмхинүүд, зунай лагерьнууд, стадионууд ажаһуугшадые хүлеэн абаха.