567
Энэ удаа Сурхарбаанда буряадуудһаа гадна Хальмаг, Тува, Монгол Уласуудай түлөөлэгшэд – дүн хамта 700 гаран хүн хабаадаба. Санкт-Петербургын дасанай шэрээтэ лама Буда Бадмаев, «Ая-ганга» гэһэн Буряад соёл хүгжөөлгын жасын хүтэлбэрилэгшэ Цырендари Самбуева болон Санкт-Петербургын Үндэһэ яһатанай байшанай таһагые даагша Владислава Новикова гэгшэд сугларагшадые амаршалжа, баярай үгэнүүдые хэлээ.
Коронавирус үбшэнэй дэлгэрһэнһээ боложо, хэдэн жэл эмхидхэгдээгүй байһан тус наадан байгша ондо илангаяа һонирхолтойгоор үнгэрөө. Бүхэ барилдаан болон спортын бусад зүйлнүүдээр тэмсээнүүд олоной дура татадаг ёһоороол татаба. Мүн уран бэлигтэнэй бэлдэһэн тоглолтошье буряадуудай соёлой гайхамшагые дахин гэршэлээ.
Харагшадай һонорто «Мүнгэн шүрэ» бүлгэм, Анна Лхамадиева, Батор Гомбожапов, тува яһанай хөөмэйшэн Саян Артын, монгол яһанай морин хууршан Мүнхбат Тувсан болон «Ая-ганга, «Алтан сэсэг», «Баин цаг» гэһэн хатарай бүлгэмүүд уран бэлигээ, абьяас шадабарияа дурадхажа, халуун альга ташалганда хүртөө. Харин һайндэрэй түгэсхэлдэ мэдээжэ дуушан Дарима Цырендондопова аялга дуун бэлэгээ барижа, сугларагшадые ёохор нааданда уряа.
Фото: «Ая-ганга» гэһэн Буряад соёл хүгжөөлгын жаса
