Буряад орон руу Оросой баруун зүгһөө бүлэг һүзэгшэд хүрэжэ ерэбэ

- Гайхалтайнь гэхэдэ, тэдэнэр буддын шажанай түүхэ, номнол ба нарин ойлгосонуудые аргагүй гүнзэгыгөөр мэдэнэ, маани мэгзэм, тарнинуудые сээжээр уншана. Гадна ламанарта үргэлшье арьбанаар барина, - гэжэ һүзэгшэдые угтажа абаһан Эрдэни Дымчиков хөөрэнэ.  

Буряад ороной ажаһуугшадта жэшээ боломо ябадал тэдэнэр харуулна гэжэ Эрдэни Дымчиков тоолохо зуураа, манай нютагайхидай дунда иимэ гүнзэгыгөөр Отошо болон бусад бурхадта һүзэглэхэ ушарнууд үсөө дайралдадаг гэжэ голхорно.     

Холоһоо ерэһэн айлшадта зорюулагдажа,11 үдэрэй хүтэлбэри зохёогдонхой. Тэрэнэйнь ёһоор, һүзэгшэд үдэрэй 2-3 дасан хүрэхэ юм. Эдэ үдэрнүүдтэ тэдэнэр Сэлэнгын аймагаар ябаа. Удаань Эгэтын, Байгалай ба Баргажанай дасангуудта хүрэжэ мүргэхэ.  

- Айлшаднай заатагүй Ивалгын дасан хүрэнэ аабза. Тэндэ Дымбрыл багшатай шажанай гүн ухаан тухай хөөрэлдөөн болохо, - гэжэ Эрдэни Дымчиков тэмдэглэнэ.

Орос гүрэн соо буддын шажантанай эгээл олоороо ажаһуудаг можо нютаг болбол Буряад орон гэжэ мэдээжэ. Шажанай аяншалга хэхын тула аргагүй һайнаар бэлдэхэ хэрэгтэй. Эндэ нэн түрүүн сэдьхэлэй бэлэдхэл тухай хэлэгдэнэ. Юуб гэхэдэ, нангин шүтөөнэй газараар ябажа, адис хүртэхын тула сэдьхэлдээ тусхай байдал тогтооһон байха хэрэгтэй ха юм.    

Буряад ороной мүргэлэй, нангин шүтөөнэй газарнуудаар, гол түлэб, зунай сагта һүзэгшэд ябадаг юм. Анхан ондоо можо нютагуудай зон илангаяа август, сентябрь һаранууд соо, аршаан булагуудай уһанай эршэ хүсэтэй байхада олоороо ерэдэг һэн. Харин Эрдэни Дымчиковэй хэлэһээр, мүнөө жэл зунай эхилһэнһээ хойшо холо ойрын һүзэгшэд бууна. Энэнь баһа «Байгал» аэропортын ажал ябуулгын зохимжотой болоһонтой холбоотой юм ха.