889
Хэрэн һууринда ажаһуудаг Леонид Патахинов ниигэмэй хэлсээнэй ашаар дарханай гэр нээһэн байна. Тэрэнэй бүтээһэн зүйлнүүдээр ганса Хэрэнэй бэшэ, Түнхэнэй аймагай бусадшье нютагуудай ажаһуугшад ехэ һонирхоно, худалдажа абана.
2021 ондо ниигэмэй хэлсээ баталаа һэм. Тэрэ мүнгөөрөө барилгын хэрэгсэлнүүдые, зэр зэмсэг гэхэ мэтые абааб. Гадна «Минии бизнес» гэһэн олзын хэрэг эрхилэлгын түбтэ тусхай һуралсал гарааб. Тэрэнэйнгээ ашаар һара бүри 30-аад мянган түхэригэй олзо олоноб. Иимэ программа бии болобо гэжэ дууламсаараал, ниигэмэй хамгаалгын албан руу хандаа һэм. Сэхыень хэлэхэдэ, һанаһан юумэмни бэелхэ гэжэ нэгэшье маргаагүйлби даа, - гэжэ олзын хэрэг эрхилэгшэ Леонид Буяндылгерович хөөрэнэ.
Буряад орондо 2022 оной эхинһээ ниигэмэй хэлсээнэй үндэһөөр 1700 гаран хүн бүхыдөө 289,7 сая түхэригэй гүрэнэй туһаламжа абаа. Түнхэнэй аймагта 49 хүн хамта дээрээ 7,5 сая түхэригэй дэмжэлгэдэ хүртөө.
Фото: Түнхэнэй аймагай захиргаан
