Буряад орондо бүтээгдээ

- Манай павильон Алексей Олегович Чекунковто һайшаагдажа, бэшэ субъектнүүдтэ жэшээ болгоё гэжэ тэрэ дурадхаа. Тиигэхэдээ ганса Алас Дурнын гудамжада бэшэ, харин аяншалгын, худалдаа наймаанай болон ондоошье  хэмжээ ябуулгануудта, - гэжэ Буряадай Толгойлогшо Алексей Цыденов тэмдэглээ. 

 «Буряад орондо бүтээгдээ» гэһэн үзэсхэлэндэ «Хатан» этномаркедай үндэһэн хубсаһан, «Дикая Сибирь» компаниин гараар оёгдоһон гуталнууд, «Войлок Бурятии»  компаниин зүйлнүүд, Velena brend ба Vita Eremeeva гэгшэдэй үнэтэ шулуунуудые һуулгаһан гоёолтонууд,  «Аригуна» компаниин зүүдхэлнүүд, Vera Glassай шэлээр урлаһан гарай бэлэгүүд,  «Zam» этномаркедай гарай болон дурасхаалта бэлэгүүд, «Домбо» студиин заншалта амһартанууд, Валерий Ротенковой модоор урлаһан бүтээлнүүд, «Планировочка» компаниин үнгэтэ дэнгүүд, «Dulаan» маркын годон гуталнууд, Nomads Shop гэһэн арһан, булгайр зүйлнүүд, Татьяна Герасимовагай хүүхэлдэйнүүд үргэнөөр дэлгэгдээ. Эндэл амтатай ба бэе махабадта туһатай сайнууд, унданууд, Байгалай эрьеэр суглуулһан ургамал жэмэсүүдһээ «Лесная фабрика» компаниин болбосоруулһан зүйлнүүд, элдэбын амтан шэхэрһээ эхилээд,  эдеэ хоолой эрхим дээжэнүүд олондо дурадхагдаа. Буряад орондо үйлэдбэрилэгдэһэн эд бараан хуралдаанай айлшадта болон хабаадагшадта ехэтэ һайшаагдаа. Түрүүшын гурбан үдэрэй туршада 1,5 сая шахуу  түхэригтэ наймаа ябуулагдаа. 

Буряадай Засагай газар шэнэ партнёрнуудые олохо, хэлсээнүүдые баталха, дүй дүршэлөөрөө хубаалдаха, Буряад ороноо Алас Дурнын бэшэ можо нютагуудай түлөөлэгшэдтэ харуулха эрхим аргада хүртөө ха юм.