993
Нэрэ түрэтэй тус урилдаанда Ород Уласай 69 можо нютагһаа 68 хүн хабаадаха тухай мэдүүлгэ ороһон байна. Түрүүшын, мүн хоёрдохи шатань Ставропольско хизаарта сентябриин 11-18-ай үдэрнүүдтэ үнгэрнэ. Түрүүшын шатада багшанар хэшээлнүүдые үгэнэ, харин удаадахидань үхибүүдтэй хөөрэлдэнэ (классный час). Залуушье һаа, багшын ажалда дүршэлтэй болоһон Арюна Буяндэлгэровна 2021 ондо «Эрхим багша-2021» гэһэн урилдаанай Гран-при шанда хүртэжэ, нэн түрүүн шабинараа, түрэл гаралаа, нютагаархидаа баярлуулһан байна.
Нютагайнгаа багшые дэмжэжэ, хүтэлбэрилэгшөөрнь Д.Банзаровай нэрэмжэтэ Буряадай дээдэ һургуулиин багша, багшын эрдэмэй дид- доктор, доцент Оксана Александровна Дареева ошобо. Үшөө тиихэдэ Өөрлигэй дунда һургуулида суг хүдэлжэ байһан багшанар Алексей Пурбуевич Папаев, Ринчима Александровна Зандеева, Октябрина Жаргаловна Ошорова гэгшэд холын замда гараа. Холын тэрэ нютагта эмхидхэгдэһэн мэргэжэлтэ урилдаанда амжалтатай хабаадажа ерэхыень уряалая. Һануулан хэлэбэл, эдэ үдэрнүүдтэ конкурсын 1-дэхи шата үнгэргэгдэжэ байна. Сентябриин 16 болотор Бүхэроссиин тэмсээндэ хабаадажа байһан нютаг басагандаа дуугаа үгэхэ аргатайт.
