713
Хүшөөгэй нээлгэдэ Буряадай Засагай газарай, Улаан-Үдын мэриин, Улаан-Үдын ба Буряадай епархиин, эмшэдэй ниигэмэй түлөөлэгшэд, олзын хэрэг эрхилэгшэд хабаадаа. Сугларагшадай урда Буряадай Толгойлогшо үгэ хэлээ.
- Элүүрые хамгаалгын һалбариин хүндэтэ ажалшад хорон хамшагтай тэмсэлдэ хүсэеэ элсүүлжэ, сэдьхэлээ үгөө. Хорон хамшаг бүхы дэлхэйдэ болон манай эмшэдтэ эрилтэ гээшые ехээр табяа. Гиппокрадай, Авиценнын үенүүдһээ эхилээд, үнгэрһэн бүхы жэлнүүд соо, үдэр бүри эмшэд ами наһа абаржа байгаа. Хорон хамшагай үедэ бидэ тад ондоогоор таанадай мэргэжэлэй шухала үүргые сэгнээбди. Үбшэнэй дэлгэрһэн жэлнүүдтэ элүүр энхын һахюулда хэд байнаб, хэд ами наһаяа гамнангүй, үбшэнтэниие абарнаб гэжэ бүхы ниигэмдэ үшөө дахин һануулаа. Элдэб шатын эмшэд үбшэнтэдэй хажууда, хүлеэн абалгын таһагуудта үдэр һүнигүй ажаллаа, дуудалгануудта ябаа, өөһэдөөшье үбдөө. Хэды тиигэбэшье таанад үбшэ тогтоожо шадаат, гээлтэнүүдые үсөөрүүлээт, тэрэ тоодо өөһэдынгөө ами наһаар. Хүндэтэ манай эмшэд, харюусалгата үүргэеэ үнэн сэхээр дүүргэжэ, маанадай элүүр энхые, ами наһые хамгаалан сахижа байһандатнай би үнэн зүрхэнһөө таанадта баяр хүргэнэб, – гэжэ Буряадай Толгойлогшо хэлээ.
2021 ондо «Россиин эжынэр» хүдэлөөнэй эдэбхитэд хүшөө бодхоохо хэрэг үүсхээ. Тэдэ мүнгэн зөөри суглуулжа эхилээ, энэ хэрэгтэ гүрэнэй засагай эмхинүүд, шажан мүргэлэй түлөөлэгшэд, банкнууд, олониитын нэгэдэлнүүд болон юрын хүнүүд хабаадаа. «Сагаан сахюусаднай» гэжэ нэрлэгдэһэн тэдхэбэриин хэмжээ ябуулгын үедэ 4 сая шахуу түхэриг мүнгэн суглуулагдаа бэлэй.
Автор: Сэнгэ РИНЧИНОВ
Фото: Буряад Уласай засагай сайтһаа
