Үхибүүдэй аяншалга хүгжэхэ

- Буряад Уласай түлэбүүд федеральна хэмжээндэ амжалта туйлажа байхадань  аятай зохид байна. Командын гэшүүдые үнэн зүрхэнһөө амаршалнаб. Энэ илалта олон тоото илалтануудай нэгэн болог гэжэ хүсэнэб,- гэжэ Буряад Уласай аяншалгын сайд Алдар Доржиев хэлэбэ.

Буряад ороной онсо соёлдо аяншалагшадые шунган оруулха зорилготой “Байгалай нүүдэлшэд” түлэб  “Үндэһэн арадуудай соёлой аяншалга” янзада Гран-при абажа шадаа. Аяншалагшад Россиин эгээл эртэ урдын хотонуудай нэгэн болохо  хүннүүдэй хото хүрэжэ хараха, мянган жэлнүүдэй унда – сэгээ амталха, морёор сэнгэхэ, элинсэг хулинсагуудайнгаа заншалнуудтай танилсаха аргатай.

Бүхэроссиин урилдаанда 1-дэхи һуури эзэлһэн түлэб «Байгалай дархан газарай миһэрэл» гэжэ нэрэтэй. Түлэбэй ёһоор, аяншалагшад байгаали хамгаалгын замаар долоон хоногой туршада аятай зохидоор ябаха. Алдарта Байгал далай, дархан газарнуудые харахаһаа гадна бодото туһа хүргэхэ аргатай. Гэхэтэй хамта нютагай зоной заншалнуудтай танилсажа, буряад эдеэ хоол бэлдэжэ һураха арга боломжо үгтэнэ.