720
2021 оной октябриин 1 -нэй байдалаар, эхэнэрнүүдэй тоо 60,9 мянгаар бүhэтэй хүнүүдhээ олон гэжэ статистикын хүтэлбэри мэдээсэнэ. Харин 2010 ондо тус тоо 47.4 мянган байгаа. Энэ хадаа ажал хэхэ шадалтай наhанай бүhэтэй зоной олоороо наhа барадаг ушарhаа шалтагтай.
Yнгэрэгшэ жэлдэ 1000 бүhэтэйшүүлдэ 1133 эхэнэрнүүд байгаа, харин 2010 ондо эхэнэрнүүдэй тоо 1102 гэжэ тоологдоно. Тиихэдэ 25 - hаа дээшэ наhатай эхэнэрнүүдэй тоо бүhэтэйшүүлhээ олон болоно гэhэн мэдээтэй.
Мүн бүридхэн бэшэлгын дүнгүүдээр, уласай ажаhуугшадай дунда зэргын наhан 1,8 жэлээр дээшэлжэ, 36,8 жэл гэжэ тоологдоно (2010 ондо 35 жэл байгаа).
Эгээл «залуу» наhатайшуул Ивалгын аймагта (32,4 жэл),
Ахада (33 жэл), Яруунада (35,4 жэл) ажаhуудаг.
Харин эгээл «хүгшэн» дунда наhатан Кабанскын (40,7 жэл), Хойто – Байгалай (40,5) ба Бэшүүрэй аймагуудаар ажаhуудаг гэжэ тэмдэглэгдэнэ.
Статистикын мэдээгээр, Буряад Уласта ажал хэхэ шадалтай наhанай ажаhуугшадай тоо үсөөржэ, ажал хэхэ шадалгүй наhанай зоной тоо олошороо. Хэрбэеэ 2010 ондо 1000 ажаhуугшадай 610 – иинь ажал хэхэ шадалгүй наhанай байhан hаа, 2021 ондо тиимэ зоной тоо 788 хүрэтэр ургаа гэhэн баримта мэдээтэй.
Автор: Баярма БАТОРОВА
Фото: Буряад Үнэнэй архивһаа
