Кремлиин ордондо – ойн баяр

Буряад ороной Соёлой яаман энэ тоглолто бэл­дэлгэдэ Буряад оронойнгоо Г. Цыдынжаповай нэ­рэмжэтэ Буряадай гүрэнэй Оперо болон баледэй театр, дуу ба хатарай үндэһэн «Байгал» театр, мүнөө үеын хатарай «Угол Зрения» театр, арадай хүгжэмэй ба хатарай «Забава» театр, Залуушуулай эвенкий­скэ «Гулувун» ансамбль, Буряадай гүрэнэй цирк, шэмээшэгүүдэй коллективүүд гэһэн уран һайханай суута коллективүүдые, П.Чайковскиин нэрэмжэтэ урлалай колледжын оюутадые, эстрадын суута одо­дые элсүүлээ.

Тоглолтодо хабаадалсахаар хүршэ можонуу­дай дуу, хатарай гүрэнэй ансамбльнууд - Эрхүү можоһоо «Талын аялганууд» болон Үбэр Байгалай хизаарһаа «Амар сайн» уригдаа. Кремлиин ордон соо Буряад ороной Үндэһэтэнэй музейн болон Бу­ряад ороной экономикын болон арадай ажахын туйлалтануудай үзэмжэ дэлгэхээр түсэблэгдэнэ.

Ойн жэлдэ зорюулагдаһан тоглолтын афиша Хэмжээ ябуулгануудай эмхидхэлэй хороон бата­лаа. Үнгэрэгшэ жэлэй декабриин 27-һоо Москасса биледүүдые наймаалжа эхилээ, тэдэнэй сэн 500- һаа 6 мянган түхэриг хүрэтэр юм. Биледүүдэй сэн хаана байһан һууриһаань: 6 мянган харагшадые багтаадаг Кремлиин ордоной тоглолтын танхимай партертэ, амфитеатрта гү, али балкондо гэжэ дул­дыдана.