Эдиршүүлые эдэбхижүүлхэ замаар

Онсо шалгарһан эдиршүүл

Буряад Уласаа түлөөлэн, Эдир сэдхүүлшэдэй эблэл можо нюта­гууд хоорондын, уласхоорондын хэмжээнэй урилдаануудта амжалта түгэс оролсоһоор. Эгээл эдэбхитэй гэшүүдынь – Лубсан Бадмаринчи­нов, Аюна Очирова, Сергей Дашиев гэгшэд Буряад Уласай Гүрэнэй шан­гай лауреадууд болоһон юм.

Гушан жэлэй туршада бэеэ харуулһан гурбан үе эдиршүүлые нэр­лэе. Түрүүшын арбан жэлдэ Тамара Харанутова, Ирина Сысоева, Чимита Цынгуева, Жигмит Доржиев болон бусад онсо шалгараа. Хоердохи арбан жэлдэ Лубсан Бадмаринчи­нов, Агния Шатаева¸ Мария Руси­на эдиршүүлэй эмхиин һураг суу дэлхэй дүүрэн тараагаа. Гурбадахи арбан жэлдэ Арина Доржиева, Дари Дамдинова, Цырен Рабдаев, Слава Асалханов, Ангелина Стремилова, Арина Цыбикжапова бэеэ мэдүүлээ. Дүрбэдэхи халаан ерэхэл байха гэжэ найданабди.

Амжалтанууд

Үнгэрһэн хоёр жэлэй дүнгүүд урма баяр түрүүлнэ. “Артек” түбтэ “Оптимист проверяется жизнью” гэжэ номой түлөө Гран-при шан үгтөө. “Орлёнок” түбтэ 1-дэхи шатын диплом барюулагдаа. “Буряадай үхибүүд” гэжэ фильм Москвада «Эхэ орон зүрхэн соо» гэжэ 6-дахи медиафестивальда түрүүлээ. Энэл фильм Бүхэроссиин “Алый парус” урилдаанда гурбадахи шатын дипломоор шагнагдаа. Владивосток хотодо “Весёлая ларга” гэжэ фестивальда Алдар Цыденжапов тухай бэлдэһэн фильм мүн лэ түрүүлээ.

Заншалта ёһоороо “Алтан гуурһан” урилдаан Буряадай хэмжээндэ эмхидхэгдэһээр.

Шэнжэлгэнүүд

Үхибүүдэй мэдээсэлгын нэгэдэлнүүдые Буряадай эдир сэдхүүлшэдэй эблэлые хүтэлбэрилэгшэ Людмила Будажаповна Доржиева шэн- жэлһээр. Энэл сэдэбээрээ эрдэмэй кандидадай нэрэ зэргэ 2004 ондо хамгаалһан байна. Энэл багшын аша оролдолгоор эблэлэй ажал зогсоногүй, жэлһээ жэлдэ эршэдэһээр. Гушан жэлэй туршада энэ шэглэлээр хүдэлжэ, байгуулһан холбоонуудынь улам бэхижэһээр.

Үнгэрһэн жэлэй декабрь һарада Эдир сэдхүүлшэдэй эблэл байгуулагдаһаар 30 жэлэйнгээ ойн баярта Буряадай Болбосоролой болон эрдэм ухаанай яамантай хамта “Мүнөөдэрэй медиа-талмайн хүмүүжүүлхы арга боломжо” гэжэ бүхэроссиин эрдэмэй-практическа хуралдаа эмхидхээ. Москва, Екатеринбург, Владивосток, Казань болон Санкт-Петербург хотонуудһаа хабаадагшад энэ хуралдаанда оролсоо бэлэй.