«Багша – эгээл шухала мэргэжэл»

- Багша – эгээл шухала мэргэжэл. Хамаг юумэн булта эхи захатай. Маанадые эгээл түрүүн hурган болбосоруул­даг хүнүүд – манай багшанар ба hурган хүмүүжүүлэгшэд, - гээд, сугларагшадые Бу­ряадай Толгойлогшо Алек­сей Цыденов амаршалаа. - Би тус мэргэжэл эгээл шу­хала ба хүндэтэй гэжэ үнэн­хэ зүрхэнhөө тоолодогби. Аша габьяата ажал хүдэл­мэриинтнай түлөө баярые хүргэнэб! Yхибүүдыемнай хүмүүжүүлэн ургуулhанайт­най түлөө баярые хүргэнэб! Аргагүй ехэ харюусалгатай үүргэтэйт!

Буряад Уласай Толгой­логшо Алексей Цыденов болбосоролой болон эрдэм ухаанай сайд Валерий Позд­няковтой болон «Багшын түрүүшын алхам» гэжэ кон­курсдо илагша Чимита Шаг­дуржаповатай хамта энэ жэлые хуулита ёһоор нээбэ. Энэ ёһололдо болбосоро­лой болон эрдэм ухаанай сайдай зүбшэлэгшэ, “Эрхим багша” конкурсын Гран-при шан абагша Арюна Иванова оролсоо.

Ородой Холбоото Уласай Юрэнхылэгшэ Владимир Путинай зарлигаар, 2023 он Багшын ба залан хүтэлэг­шын жэл гээд соносхогдоhон гэжэ hануулая. Тус жэлэй үүргэ табилангынь – эрдэм hуралсалай хүдэлмэрилэг­шэдэй, тэрэнэй тоодо hурган хүмүүжүүлэгшэдэй, онсо тус­хай үүргэтэ нэрэ зэргыень сэгнэн хүндэлэлгэ. Энэ жэл багшын нэрэ хүндые үргэhэн суглаа хуралдаанууд, теле­шоу болон элдэб янзын кон­курснууд үнгэргэгдэхэ.