Найрамдал бэхижүүлһэн наадан

 Ододой уулзалга

Тэмсээнэй дүримэй ёһоор, 55- һаа дээшэ наһанай эхэнэр­нүүд, мүн 60-һаа дээшэ наһа­най бүһэтэйшүүл хабаадаха эрхэтэй байгаа. Тамирай талмай дээрэ одото волей­болистнууд гаража, одоошье ялас гэмэ наада харуулаа гэжэ тэмдэглэлтэй. Буряадай 100 жэлэй ойдо зорюулаг­даһан тэмсээ үнгэргэжэ бай­гаа хадаа нэн түрүүн дүршэл шадабари ехэтэй тамирша­дые хабаадуулха оролдолго эмхидхэгшэдэй талаһаа гар­гагдаһан байна. Монгол оро­ниие түлөөлжэ оролсоһон волейболистнуудай дунда залуу наһандаа гүрэнэйнгөө нэрэ хүндые уласхоорондын хэмжээндэ хамгаалжа бай­һан хүнүүд олон байгаа.

Монголой Ахамад волей­болистнуудай холбооной юрэнхылэгшэ, уласхоорон­дын классай спортын мастер, тус тэмсээ эмхидхэлгые Монголой талаһаа харюу­саһан Раднаа гуай Буряадай тамиршадтай үнинэй танил юм.

- Буряадай волейболист­нуудтай үнинэй наададагб­ди, тиимэһээ энэ тэмсээ үн­гэргэхэ үүсхэлэй гарахада, ехэ баярлааб. Мүншье саа­шадань заншалта болгожо, Үбэр Монголой түлөөлэгшэ­дые хабаадуулха хэрэгтэй гэжэ бодогдоно. Спортын лэ ашаар эб найрамдалнай, нүхэд ёһоной харилсаам­най улам бэхижэхэ аргатай бшуу. Гоёл даа! Ветеранууд­най ямар бэрхээр наадана гээшэб, харыт! – гэжэ Раднаа гуай һанамжаараа хубаалда­на.

Түгэсхэлэй шатада гараха аад...

Бүлэгэй түрүүшын наа­данда Монголой түлөөлэг­шэд бэе бэетэеэ уулзаа. Га­раһаар лэ үндэр хэмжээнэй наада харуулхадань, медали­ин түлөө шангахан байлдаан болохонь ха гэжэ мэдэрһэн тамиршад бэеэ зэһэнэ. Һүүлэй һүүлдэ түрүүшын уул­залга үнгэргэһэн эдэл хоёр команда түгэсхэлэй шатада илалтын түлөө тэмсээ. Харин финалда гарахынгаа урда тээ өөр өөрынгөө бүлэгэй бүхы командануудтай наадаха ёһотой байгаа.

«Буряад үнэн» Хэблэлэй байшанай нэрэ хүндэ тус тэмсээндэ сурбалжалагшад бэшэ, анхан мэргэжэлэй хэмжээндэ волейбол наа­дажа байһан ахамад тамир­шад хамгаалаа гэжэ тэмдэглээд, сонинойнгоо нюур дээрэһээ тэдээндээ баяр хүргэнэбди. Мүн манай ко­мандын Үбэр Хангай айма­гай түлөөлэгшэдтэй (удаань финалда гараһан команда) наадаһан тухай онсо тэмдэглэлтэй. Буряадай тамиршад түрүүшынгээ партида илалта туйлажа, олониие гайхуулба. Удаадахидань монголшууд эхилһэнһээ хойшо урагшаа гараһаар гараад шүүжэ ша­даа. Шиидхэхы удхатай гур­бадахи парти эхилбэ. Буряа­дууд 10:5 тоотойгоор булижа байтараа, халаг, хүсэгдэбэл даа. Наада хаража байһан зон хоолойнгоо һөөлдэтэр, альганайнгаа хордотор, өөр өөрынгөө командын түлөө һанаа үнөөн болоно. Тии­гэжэ «Буряад үнэнэй» коман­да хоёр очкогоор шүүгдэжэ, полуфиналда гаража шадаа­гүйнь харамтай.

Нүгөө бүлэгтэшье баһал шанга гэгшын тэмсээн болоо. Буряад орониие түлөөлһэн үшөө нэгэ команда Буряадай гүрэнэй хүдөө ажахын акаде­миин туг доро хабаадалсажа, мүн лэ полуфиналда гаража шадаагүй. БГСХА-гай коман­дын ударидагша, энэл дээдэ һургуули түгэсхэһэн Бато Се­мёнов Буряадайнгаа тамир­шадта хандажа: «Монгол­шууднай долоон хоногтоо гурба дахин сугларжа наадажа байна. Бидэнэр баһал саг үргэлжэ һорилго хэжэ байха ёһотойбди. Удаадахи тэмсээндэ Үбэр Монголой түлөөлэгшэд оролсоо һаань, бүри үргэн дэлисэтэй, үндэр хэмжээнэй наадан болохонь ха юм», - гэжэ тэмдэглээ.

Аха дүү арадууд

Тэмсээнэй нээлтын баяр ёһолол Монголой ба Оро­дой түрын дуулалаар эхилээ. Хабаадагшадай жагсаалай һүүлээр мүрысөөнэй ахамад судья тамиршадай бэлэн бо­лоһон тухай дуулгаба. Буряад Уласһаа Монгол Уластай ха­рилсаа холбооной талаар сайд Даба-Жалсан Чирипов амаршалгын үгэ хэлээ.

- Бидэ нэгэ түүхэтэй, нэгэ үндэһэтэй арадуудбди. Хүн­дэ хүшэр сагта бэе бэедээ дэмжэлгэ үзүүлдэг һайхан заншалтайбди. Монгол оро­ной Манжын ноёрхол до­роһоо гараһан, Халхын Голой байлдаанда яажа илалтын туйлагдаһан тухай, мүн Эсэгэ ороноо хамгаалгын дайнай үедэ аха дүү монгол арадаймнай СССР гүрэндэ туһалам­жа үзүүлһэн тухай булта мэдэнэбди, түүхын хуудаһанууд дээрэшье энээн тушаа бэ­шээтэй. Мүнөө тамирай ба соёлой һалбарида хани ха­рилсаанайнгаа үргэлжэлхые хараад, баяртай байгдана, - гэжэ Даба-Жалсан Чирипов тэмдэглээ.

Тэмсээнэй дүнгөөр «Хил­чин» (Хилэшэн) команда ялас гэмэ наада харуулжа, түрүү һуурида гараа. Шагнал ба­рюулгын баяр ёһолол дээрэ «Буряад үнэниие» түлөөлһэн Владимир Замалиевта «Тэм­сээнэй эрхим наадагша» гэһэн нэрэ зэргын олгогдо­ходо, харагшадшье, тамир­шадшье зүбшөөжэ, халуун альга ташалгаараа амарша­лаа. «Эрхим хамгаалагша» гэһэн шанда мүн лэ «Буряад үнэнэй» түлөө наадаһан Еле­на Батодоржиева хүртөө.

«Буряад үнэн» Хэблэлэй байшанай захирал-юрэн­хы эрхилэгшэ Даши-Доржо Болотов тэмсээ эмхидхэхэ хэрэгтэ хам оролсоһон эмхи зургаануудта баяр хүргэжэ, дурасхаалай бэлэгүүдые ба­рюулаа.

Монголой Волейболой холбооной хүндэтэ медаль­нуудаар Владимир Зама­леев, Аюр Дашиев, Георгий Тарбажеев гэгшэд шагнаг­даа. Мүн Бато Семёнов, Ген­надий Марактаев гэгшэдтэ алталмал бүмбэгэнүүд ба­рюулагдаа.

Эхилһэнээ үргэлжэлүүлхэ

Тус тэмсээе «Буряад үнэнэй» Монголдохи сурбал­жалагша Норжима Цыбико­ва үүсхээд, эмхидхэлэй ажал ябуулба. Нэн түрүүн Монго­лой Волейболой холбоонтой харилсаа тогтоожо, дэмжэл­гэдэ хүртэһэниинь һайшаал­тай. Тэрэнэйнь ашаар Улаан- Баатар хотын Чингэлтэй дүүрэгэй захиргаан тэмсээ үнгэргэхэ ажалай диилэнхи хубиие даажа гараа. Шангай жаса байгуулгада Буряадай мэдээжэ меценат Валерий Доржиев горитой нэмэри оруулаа. Уласаймнай Заса­гай газар унаа гаргажа, та­миршадые Улаан-Баатар абаашаха, асарха асуудал шиидхээ. Энээндэнь нэн түрүүн Буряадай Толгойлог­шо Алексей Цыденов, мүн Монголтой харилсаа холбооной талаар сайд Даба-Жал­сан Чирипов гэгшэдэй үүргэ ехэ.

Тэмсээнэй дүүрэһэн хой­но удаадахи уулзалгадаа Үбэр Монголой, Буряадай ба Мон­голой тамиршадые хабаадуулха тухай хэлсээн болоо. Хүхэ-Хотын түлөөлэгшэдтэй холбоо тогтоохо ажал Монго­лой Ахамад волейболистнуу­дай холбоон даажа абаа.