Ерээдүйгөө хүмүүжүүлэе!

Буряад Уласаймнай олон һур­гуулинуудта иимэ шэнэ тушаалтад хүдэлжэ эхилээ. Һуралсалай аяар нэгэ жэлэй үнгэржэ байхада, зарим тэды дүнгүүдтэй танилсаха һанаа­тайбди. Һуралсалай гуламтануудай хүмүүжүүлгын талаар захиралнуу­дай орлогшонорой ажалые эдэ шэнэ тушаалтад дабтажа хэхэнь гү гэһэн һанамжа хүн зоной һанаа бодол хүл­гөөнэ гэхэдэ, алдуу болохогүй.

Хүмүүжүүлгын, илангаяа патри­отическа талаар ажал гүрэн дотор­най хүсэд ябуулагдаагүй байгаа гэжэ тусхай сэрэгэй операци абаһаар лэ харуулаа. Энээн дээрэ үндэһэлэн, Владимир Путин хүмүүжүүлгые эр­шэдүүлхэ хүсэлтэйгөөр шиидхэбэ­ри абаа гээшэ. Гэхэтэй хамта бүхы һуралсалай гуламтанууд бүхэрос­сиин, можо хизаарай хүүгэдэй хүдэ­лөөнүүдтэй нягта харилсаа холбоотойгоор хүдэлхэ ёһотой гэжэ Влади­мир Путин ойлгуулһан байна.

Түнхэнэй аймагта Эсэгэ орондоо дуратайгаар хүмүүжүүлгые, хизаар ороноо һайнаар шэнжэлэн һургаха талаар ажал яһала һайнаар ябуулаг­дана. Байгуулагдаһаар 100 жэлэйн­гээ ойн баяр тэмдэглэһэн Хэрэнэй дунда һургуулида зүбшэлэгшөөр Ирина Баировна Пурбуева хүдэлнэ. Иимэ үндэр тушаал эзэлхыень һу­ралсалай гуламтын захирал болон орлогшонор дурадхаа.

- Тиимэшье удаан түрэл һургуу­лидаа хүдэлөөшьегүй һаа, шэнэ ту­шаалда хүдэлхэ һанаатай байһанаа мэдүүлээб. Энэ тон ехээр намайе һо­нирхуулаа. Зунай хаһада багахан һу­ралсал гараһан байнабди. Хэды тии­гэбэшье шэнэ зүбшэлэгшын ажалые тодорхойлжо хэлэхээр бэшэ байгаа. Олон ойлгогдоогүй асуудалнууд га­раа, - гэжэ залуухан Ирина Баировна хөөрэнэ.

Зүбшэлэгшын хэлэһээр, үхибүүд тон ехээр Эсэгэ орондоо дуратай­гаар хүмүүжүүлэгдэхэ ёһотой. Энэ ушараар Ирина Баировна олон тоото хэмжээ ябуулгануудые үнгэргэжэ эхилээ, классай хүтэлбэрилэгшэдтэй, үхибүүдтэйгээ нягта харилсаа хол- боотойгоор хүдэлжэ байһаниинь, олондо һайшаагдаа.

- Энэ һуралсалай жэлдэ долоон хоногой эхиндэ һуралсалай гуламта­да гүрэнэй туг үргэгдэдэг болонхой. Удаань классай час тусхай темэдэ ду­радхагдана. Юун тухай тэндэ хөөрэл­дэхые классай хүтэлбэрилэгшэдтэй хөөрэлдэнэбди, бэлдэжэ, үхибүүдээр һайхан зугаа дэлгэнэбди. Олон ушарта тэндэнь өөрөө хабаадалса­наб даа, - гэжэ Ирина Баировна ажал тухайгаа һонирхолтойгоор хөөрэнэ.

Патриотическа хүмүүжүүлгын талаар хэмжээ ябуулганууд Хэрэнэй һургуулида олошороо гэжэ үхибүүдшье, багшанаршье хэлэнэ. Һу­ралсалда эдэ нэгэшье һаад үзүүл­нэгүй гээд һурагшад нэгэ дуугаар тэмдэглэнэ. Жэшээлбэл, эхин клас­сай үхибүүд “Орлята России” гэһэн тусхай түсэлдэ хабаадажа эхилэнхэй.

Зүүн-Мүрэнэй дунда һургуулиин зүбшэлэгшэ Аюна Аюшеевна Данже­евагай һанамжаар, “Орлята России” гэһэн түсэлөөр үсөөн хэмжээ ябуул­ганууд эмхидхэгдэхээр хараалагдан­хай.

- Эдир һурагшаднай бүхы юумэ бэедээ һайнаар шэнгээжэ абаха аргатай ха юм. Эгээл энэ наһанай үхибүүдэй дунда патриотическа та­лаар һонирхолтой хэмжээ ябуулга­нуудые олоор дурадхабал, хуу ойл­гожо, хадуужа абаха байгаа. Минии һанахада, энэ наһанай үхибүүдтэ үсөөн хэмжээнүүд дурадхагдана, - гэжэ Аюна Аюшеевна һанаа бодолоо элирхэйлнэ.

Зүүн-Мүрэнэй болон Хэрэнэй һургуулинууд “Орлята России” бо­лон “Движение первых” гэһэн Ородой Залуушуулай болон үхибүүдэй нэгэдэлдэ (РДДМ) оронхой. Һаяха­на, майн 15-да, Зүүн-Мүрэнэй хүбүүд, басагад РДДМ-эй гэшүүд болоһон байна. Эдэ бүгэдэ хамтаруулгын, ха­рилсаа холбоотойгоор хүдэлхэ ажал зүбшэлэгшэдэй ээм дээрэ унана бшуу.

Эдэ үдэрнүүдтэ бүхэроссиин хүү­гэдэй “Океан” түбтэ хүмүүжүүлгын та­лаар зүбшэлэгшэд тусхай хуралдаан- уулзалгада сугларанхай. Буряад Ула­сые 222 хүн түлөөлнэ.