Сэрэгшэдтэ сэгнэшэгүй туһаламжа

Сэрэгшэдэй гэр бүлэнүүд, түрэһэн нютаг, аймагынь арга шадалаараа сэрэгшэдтээ туһа хүргэнэ. Жэшээнь, Захааминай аймагай Сагаан-Морин нютагай Светлана Ни­колаевна Самбуева тусхай операциин эхилһээр сэрэгэй албанда сэгнэшэгүй туһаламжа хүргэнэ. Свет­лана Николаевна хүндэ хүшэр сагай дүтэлхэдэ, гансал сэрэгшэдтэ бэшэ, бүхы Орос гүрэндөө ямар аргаар ба юугээр туһалхада болохо байнаб гэжэ бодолдо абтаһан байна. Удан­гүй Захааминай волонтёрнуудай түбэй түрүүлэгшэтэй Золто Жамсу­евтай холбоо барижа, һанаһанаа хэ­лээ бэлэй. Золто Жамсуев Светлана Николаевнагай бодолыень дэмжэжэ, Захааминай аймагай волонтёрнуу­дай тоодо оруулаа.

Светлана Самбуева тусхай опера­цида хабаадажа байһан сэрэгшэдтэ, үнэхөөрөөшье, сэгнэшэгүй туһалам­жа хүргэнэ гээшэл даа. Сагаан-Мо­ринһоо гадна, бүхы Захааминай гэр бүлэһөө мүнгэ ба хубсаһашье, эдихэ хоолшье суглуулжа, хүбүүдтэ эгээл хэрэгтэй ба хоморой квадрокоп­тернуудые заатагүй абажа эльгээхэ хэрэгтэй гэжэ үүсхэл гаргаһан байна. Энэ һанал бодолыень Захааминай зон булта дэмжээ. Тиигэжэ нютагаар­хид түрүүшынхиеэ 100 мянга гаран түхэриг суглуулһан байна. Туһалам­жа соонь ганса мүнгэн бэшэ, үүсэдэ гаргагдаһан мяханшье, дулаан хуб­саһа хунар, эм гэхэ мэтын сэрэгшэдтэ хэрэгтэй эд зөөри ороһон юм.

“Теэд энэ туһаламжаяа ямар ар­гаар сэрэгшэдтээ эльгээхэ гээшэб?” - гэжэ хүндэ асуудал эдэбхитэдэй урда гараа. Өөһэдөө туһаламжаяа хүр­гэжэ, Украина ошоходо дээрэ гэжэ волонтёрнууд хэлсээ бэлэй.

Улаан-Үдэһөө Москва хүрэтэр самолёдоор, Москваһаа Украина хүрэтэр машинаар ябажа, тэдэнэр туһаламжаяа хүбүүдтээ хүргөө бэлэй. Юрэдөө, Светлана Самбуева айма­гай волонтёрнуудтай нэгэдэжэ, гур­ба дахин Украина ошоо.

Эсэгэ оронойнгоо түлөө оролдо­сотой хабаадажа байһан сэрэгшэд­тээ туһатай байха хэрэгтэй гэжэ мэ­дэе. Үнэхөөрөөшье, Светлана Нико­лаевнагай бүтээжэ байһан хэрэгэй буян хэзээдээшье үри хүүгэдтэнь, гэр бүлэдэнь буддын шара шажанай ёһоор бусажа ерэхэл даа.