Жэшээтэ поликлиникэ

Түүхэһээ

XX зуунай эхинэй со­нинууд соо Дээдэ Үдэдэ шүдэнэй эмшэнэй ори ган­са нэрэ дурсагдана. Евге­ний Мильштейн шүдэ эмнэлгын газар зохёон бай­гуулаад, уставыень бэл­дэһэн юм ха. Тэрэ өөрөө жиирэй зонойшье, сэрэг­шэдэйшье шүдэ эмшэлдэг байһан. 1923 ондо Буряад­та дүрбэхэн эмшэд энэ шэглэлээр хүдэлөө. 1932 ондо шүдэ дархалагша бии болоо, харин 1940 ондо – түрүүшын ёһотой стомато­лог.

Буряадай АССР-эй элүүрые хамгаалгын сайд Л.Д. Мадыевагай 1981 оной ок­тябриин 22-ой захирал­таһаа уласай стоматологи­ческа поликлиникын түүхэ эхилнэ.

Уласай больницын бүридэлэй шүдэ эмнэлгын хабшуу кабинедүүд урид олон дабхар гэрэй под­вал соо оршодог байһан. Тэрээн соо аппаратура креслэ хоёрые табиха­дань, эмшэн үбшэнтэн хоёр арай багтадаг һэн. Үдэр бүри хандагшадай тоо ургаһаар байгаа ха юм. Тиимэһээ уласай боль­ницын стоматологическа таһагые даагша, Буряадай АССР-эй Элүүрые хамгаалгын яаманай штатна бэшэ стоматолог, СССР- эй Верховно Соведэй һун­гамал Октябрина Матве­евна Омбоева поликлиникын мүнөөдэрэй бай­шан барилгые үүсхэн эм­хидхэжэ, ашаглалгада ту­шаалгаһан байна. Тиигэжэ уласай больницын элдэб тээгүүр тааранхай шүдэ эмнэлгын кабинедүүд нэгэ тээ суглуулагдаһан юм.

- Октябрина Матвеена­гай ашаар стоматологиин албан хүгжэлтэ абаһан. 28 жэлэй туршада шүдэ эмнэлгын һалбариие хүтэлбэ­рилхэдөө, Улаан-Үдэдэ шүдэ эмнэлгын тусхай по­ликлиникэнүүд нээгдэһэн юм. Эдэбхи ехэтэй энэл эхэнэрэй аша оролдолгоор шүдэнэй эмшэдые бэлдэжэ эхилээ, - гэжэ Эр­жена Буянтуева онсолно.

О.М. Омбоева наһанайнгаа амаралтада гарахадаа, даагаад ябаһан тушаалаа шабидаа – Иван Василье­вич Шухоевто үлөөһэн юм. Тэрэнь шүдэ эмнэл­гын шэнэ оньһон арга бо­ломжонуудые нэбтэрүүлжэ эхилээ. Хэрэглэдэг оньһон түхеэ­рэлгэнүүдыень шэнэлээ. 1998 ондо стоматологуудай эблэл байгуулагдажа, тэрээниие Буряадай АССР-эй габьяата эмшэн, Ородой Холбоото Ула­сай габьяата эмшэн И.В. Шу­хоев ударидаһан юм. Стома­тологиин албанай хүгжэлтэдэ энэ эблэл баһал нүлөөлөө.

2005-2016 онуудта Ба­то-Жаргал Аюшеевич Будаев поликлиникые даагаад ябаа. Тиихэдээ стоматологиин һал­бариие хүгжэлтын ехэ орьёл­до хүргэжэ шадаа. Буряадта эгээл түрүүн имплант хэхэ хирургиин болон ортопе- диин шэнэ шатануудые нэб­тэрүүлээ.

Ажалдаа дуратайнууд

Поликлиникын гол баялиг – ажалдаа ехэ дуратай мэр­гэжэлтэд. Үдэр бүхэн уладай шүдэ эмшэлжэ, үбшэнһөөнь зайсуулна. Тиихэдээ бүхы байгаа мэдэсэеэ, дүршэлөө, хүсэ шадалаа үгэнэ, - гээд, уласай поликлиникын аха­мад эмшэн тэмдэглэнэ.

Эбтэй эетэй, урагшаа һа­наатай, бэе бэедээ энхэргэн хандасатай коллектив бай­гуулагданхай. Залуу халаан урда үеынхидэй заншал ха­лан абаад үргэлжэлүүлһээр. эндэ хүдэлнэ. Мүнөө дээрээ энэ поликлиникэдэ 300 гаран дээдын гарай мэргэжэлтэд хүдэлнэ. Зариманиинь 20-30 жэлдэ шүдэ эмнэлгэдэ бэеэ үгэнги ажаллаһаар.

Эмшэдэй мэргэжэлтэ һайндэрөөр уласай поликли­никын коллективые “Буряад үнэн” Хэблэлэй байшанай хүдэлмэрилэгшэд амаршал­на. Хэлсээнэй ёһоор, тэндэ шүдэеэ сэбэрлүүлхэдээ, за­рим эмшэдтэй танилсажа үрдеэ һэмди. Энхэргэн зохид хандасыень эгээл түрүүлэн тэмдэглэхэ байнабди. Үб­шэнтэнтэй хүдэлхэнь тиимэшье бэлэн бэшэ. Үреэхэ, харааха зон ябаха. Тэсэбэри ехэтэйл улад эмнэлгын һал­барида хүдэлдэг. Танда ехэ гэгшын баярые хүргэнэбди, хүндэтэ хүдэлмэрилэгшэд!