Сагаан Үбгэнэй ордон рамнайлагдаба

 Ага - Доодо Саhаша дардам хар­гын урда талада, Онон хатан эжын ордоной баруун добын оройдо ая гангаар анхилhан, улаахан улаал­зайгаар даллаhан хүхэ зүлгэ ногоон дээрэ зузаан шэлээр гоё hайханаар бүтээгдэhэн ордонтой Сагаан үбгэн Бүгэдэ Буряад орондоо морилжо бууба. Улаан Эрье (Красноярск) хо­тоhоо Онон хүрэтэр нэмжыhэн нэ­лэнхы ехэ газар дайдадаа хэтын хэ­тэдэ зол жаргал түхөөжэ байхаяа үб­гэн буурал ашата бурхан маанартаа ерэбэ гэжэ арад түмэн hүгэдэхын ехээр hүгэдэбэ, баярлахын ехээр ба­ярлаба. Тиигэншьегүй яахаб?

Сагаан Үбгэн зол жаргал, элүүр энхые, баян бүдүүниие үршөөдэг ха юм. Хэды тиимэшье hаань, Бурхан тэнгэридэ шүтэн мүргөөд, өөрөө доройд ябажа байхагүй, харин тад hөөргэ, өөрөө бурхан мэтэ арюун тунгалаг ябаха хэрэгтэй гэжэ hануу­лан хэлэе. Бурхантай, буянтай ябая!