Буряад болон Монгол Уласуудта тамирай талаар хамтын ажал хүгжөөлгэдэ үшөө нэгэ алхам хэгдэбэ

Улаан-Баатарта уласхоорондын «Илалтын Кубок» гэжэ волейболоор турнир үнгэргэгдэбэ. Агууехэ Илалтын 80 жэлэй ойдо зорюулагдаһан турнирта 64 команда хабаадаа. Тамирай энэ үйлэ хэрэг Илалтын һайндэртэ зорюулагдаһан Буряад Уласай ба Монгол гүрэнэй хамтын хэмжээ ябуулгануудта эхи үгэбэ. Буряад Уласай Толгойлогшо Алексей Цыденов, Улаан-Баатар хотын мэр Хишгээгийн Нямбаатар хоёр байгша оной март һарада уулзаһан байна. Уулзалгын удаа хэмжээ ябуулгануудай түсэб табигдаа һэн.

Уласхоорондын турнир Улаан-Баатарай «Буянт Ухаа Спорт Цогцолбор» гэһэн тамирай ордон соо үнгэргэгдэбэ. Энэ олон үүргэтэ тамирай ордон 5000 гаран хүниие багтааха аргатай.

 «Волейболоор кубок манай ниислэлэй эгээ ехэ мүрысөөнүүдэй нэгэн болоно. Энэ жэлдэ Буряад Уластай хамта тэрэниие эмхидхэжэ, Агууехэ Илалтын 80 жэлэй ойдо зорюулаабди. Тамирай талаар хамтын ажал хүгжөөлгэдэ үшөө нэгэ алхам хэгдэбэ гээшэ. Турнир үндэр хэмжээндэ үнгэргэгдэбэ. Буряад Уласай Засагай газарта баяраа мэдүүлнэбди, - гэжэ Улаан-Баатар хотын захиргаанай Тамирай хорооной түрүүлэгшэ Сурмаажавын Саранцэцэг хөөрэбэ.

Буряад Уласай Засагай газар 12 сая монгол түхэриг шангай жасада оруулаа.

 «Бидэ алтан медальда хүртөөбди, ехэ хүхюутэй байнабди! Харюусалгатайгаар турнирта бэлдээбди, иимэ һайн дүн харуулһандаа тон ехээр баярланабди. Шанга команданууд суглараа, турнир үндэр хэмжээндэ үнгэрөө», - гэжэ хабаадагша Батбаярын Одмунх хубаалдаба.

Турнирай үедэ Улаан-Баатарай ба Буряад Уласай һургуулинуудай команданууд уулзаба. Буряадай командын бүридэлдэ Улаан-Үдын, Гусиноозёрскын, Хяагтын ба Хурамхаанай аймагуудай һурагшад ороо.

 «Улаан-Баатар хотын захиргаанда баяр хүргэнэб. Үнгэрэгшэ жэлдэ Монгол гүрэндэ үхибүүдэй уласхоорондын тамирай наадануудые үнгэргөө һэмди. 15-16 наһатай Хитадай, Монголой ба Россиин хүбүүд басагад тамирай 10 янзаар мүрысөөнүүдтэ хабаадаа һэн. Мүнөө болоһон турнир тамирай талаар харилсаа улам үргэдхэбэ, Эхэ ороншоор хүмүүжүүлхэ, Оросой Холбоото Уласай ба Монголой түүхэ хүндэлэн һанажа ябаха хэрэгтэ нүлөөлбэ, - гэжэ Буряад Уласай Тамирай ба залуушуулай бодолгын сайд Иван Козырев тэмдэглэбэ.

Дэлхэйн 2-дохи дайнай Агууехэ Илалта Европын ба Азиин гүрэнүүдэй ерээдүйе элирхэйлээ. Япониин Квантун армиин Монголой дэбисхэр руу шунахайран ороходо, Советскэ Союз хилыень аршалһан байха юм. Халхын голдо совет-монгол сэрэгшэд хамта дайсантай тэмсээ. 9000 гаран совет сэрэгшэд Монгол гүрэниие аршалжа, ами наһаяа үгөө.

Дайнай үедэ Монгол гүрэн Советскэ Союзда тон ехэ туһа хүргөө. Эдеэ хоол, адуу эльгээхын хажуугаар танк ба агаарай онгосо барилгада мүнгэн зөөрёор туһалһан байна. СССР Монголой эрхэ сүлөө аршалһан дэлхэйн гүрэнүүдэй нэгэн. Мүнөө Росси Монгол гүрэнтэй хани барисаагаа бэхижүүлһээр.