Улаан-Үдэдэ һэльбэн шэнэлэгдэһэнэй удаа «Забайкалец» стадион нээгдэбэ

Апрелиин 25-да Улаан-Үдэдэ һэльбэн шэнэлэгдэһэнэй удаа «Забайкалец» гэһэн стадион нээгдэбэ. Стадион уласхоорондын хэбтэ тааруулагданхай, ямаршье хэмжээнэй мүрысөөн тэндэ үнгэргэгдэхэ аргатай. Оросой Холбоото Уласай Алас Дурна ба Арктика хүгжөөлгын сайд Алексей Чекунков, Буряад Уласай Толгойлогшо Алексей Цыденов, Улаан-Үдэ хотын захиргаанай хүтэлбэрилэгшэ Игорь Шутенков гэгшэд стадионой нээлгэдэ хабаадаба.

- Хүндэтэ манай эдир тамиршад, «Забайкалец» стадионой нээгдэһээр сэдьхэлэй гүнһөө таанадые амаршалнаб. Һэльбэн шэнэлэгдэһэн стадион дээрэ бэеэ һорижо, илалтануудые туйлахыетнай, бэеын  энхэ элүүрые, манай хамтын илалтада хубитаяа  оруулжа байхыетнай хүсэнэб. Һайн ябагты! - гэжэ Алексей Чекунков хэлэбэ.

Россиин Юрэнхылэгшэ Владимир Путинай дэмжэһэн Улаан-Үдэ хотын мастер-түсэбэй хэмжээндэ стадион шэнэлэгдээ. Эндэ нэгэ доро 1500 тамиршан бэеэ һорихо гэжэ хүлеэгдэнэ.

- Хүндэтэ нютагаархид, бидэндэ мүнөөдэр үшөө нэгэ баяртай үйлэ хэрэг боложо байна. Үргэн дэлисэтэй заһабарилгын удаа стадион нээгдэбэ. Стадион Россиин Юрэнхылэгшэ Владимир Путинай дэмжэһэн Улаан-Үдэ хотын мастер-түсэбэй хуби боложо, шэнэ амисхал абаба. Манай уласта объектнүүдэй шэнэлэлгэ үргэнөөр ябуулагдана. Мүнөөдэр гүрэн дотор орёо байдал тогтонхой, манай хүбүүд Эхэ оронойнгоо эрхэ сүлөө хамгаална. Тиигэбэшье ара талада ажамидарал тогтоогүй, хүгжэлтэ үргэлжэлһөөр. Манай залуушуул, манай үхибүүд хододоо элүүр энхэ, хүсэ шадалтай байхань болтогой. Бүхы тэмсээнүүд гансал тамирай олбог дээрэ эмхидхэгдэжэ  байг лэ. Амаршалнаб! – гэжэ Алексей Цыденов хэлэбэ.

 «Забайкалец» стадион үнгэрэгшэ зуун жэлэй 50-аад онуудта баригдаһан юм. Тэрэ гэһэн сагһаа хойшо нэгэшье заһабарилагдаагүй. Тиин 2014 ондо һандаран унахаяа байһан объектнүүдэй тоодо оруулагдажа, тамиршадай эндэ бэеэ һорихонь аюултай болоо һэн.

Тамирай 16-дахи һургуулиин бааза дээрэ оршодог «Забайкалец» стадион шэнэлэгдэжэ, үхибүүд ба ехэшүүл жэлэй дүрбэн сагта бэеэ һорихо аргатай болобо. Һургуулиин хүмүүжэмэлнүүдэй хажуугаар хотын тамирай һургуулинуудай ба федерацинуудай түлөөлэгшэд эндэ ерэжэ байха. Хүнгэн атлетикээр, футболоор һорилгонуудые эмхидхэхэ түсэб бии, мүн барилдаашадта тусхай танхим эндэ зохёогдоо. Үбэлэй сагта санашадай һорилгонууд үнгэргэгдэхээр хараалагдана.

- Хүндэтэ ажаһуугшад, Тааруу зохид оршон байгуулха талаар ехэ юумэн хэгдэнэ. Бидэ харгынуудые заһабарилнабди, сквер ба сэсэрлигүүдые болбосон түхэлтэй болгонобди, хүн зониие татаха талмайнуудые байгуулнабди. Футбол наадахын түлөө хотын түб руу ошохоёо болибот, мүнөө түбһөө таанадта ерэдэг болохо. Шэнэлэгдэһэн стадион дээрэ үхибүүд бэеэ һорижо, нэгэтэ бэшэ илалта туйлаха, абарганууд болохо, найданаб.

Тамиршадай бэеэ һорихо, багшанарай, залан хүтэлэгшэдэй ажалаа ябуулха тааруу зохид оршон байгуулхые оролдообди, - гэжэ Улаан-Үдэ хотын захиргаанай хүтэлбэрилэгшэ Игорь Шутенков хэлэбэ.

Тамирай объектын дэбисхэр дээрэ хэмэл газонтой футболой талмай, гүйдэлэй зүргэнүүд, теннисэй корт, 900 хүниие багтааха трибуна бии. Гадна универсальна хэдэн талмайнууд зохёогдоо. Амяараа байшан соо кикбоксингын, боксын, нэгэ-нэгээрээ тулалдаанай, фитнесай заалнууд, хубсаһаа һэлгүүлхэ 6 таһаг, буфет, бусал таһагууд хараалагданхай. Хизаарлагдамал арга боломжотой зондо тааруу зохид оршон байгуулагдаа гэжэ тэмдэглэлтэй.