Агынхид сугларжа мүрысэбэ

102-дохи микрорайондо оршодог «Патриот» гэһэн клубай урдахи талмай дээрэ хара үглөөнһөө хүн зон хөөрсэгэнэлдэжэ эхилээ. Агын тойрогой бүридэлдэ ородог хүдөө һуурин бүхэн тамиршадайнгаа хоол бариха, хубсаһа хунараа һэлгэхэ, саг зуура амарха майхангуудые бодхоожо тухашарна. Теэд юушье ядахаб даа. Агада болодог заншалта «Зунай наадануудай» үедэ эгээл иимэ юумэнүүд түхеэрэгдэдэг ха юм.  

- Нютагаа ошоод ябажа байһан шэнги сэдьхэлдэ одоо гоё байна, - гэжэ Агада түрэһэншье һаа, Улаан-Үдэдэ түбхинэһөөр олон жэл боложо байһан Цындыма абгай хэлэнэ. - Аймагайнгаа, тойрогойнгоо найрнуудта тон лэ иихэдээд эбтэй эетэйхэнээр, хүхюун зугаатайгаар хабаададаг бэлэйбди. Нютагаймнай эгэшэнэр ерэжэ, бидэнэртээ хоол хошыемнай бэлдэхэ, майхангууд соо хонохобди. Иигэжэ ябахадаал, бэе бэетэеэ дүтэ болодог, нүхэсэдэг байгаалди даа.   

Теэд Агын эблэлэй тамирай найрай гол зорилгонуудай нэгэниинь хадаа Буряад орондо ажаһуужа байһан нютагаархинаа имагтал бэе бэетэйнь танилсуулха, улам ойртуулха гэһэн хүсэл байгаа. 

- Минии Улаан-Үдэ ерэжэ һуурижаһаарни, табяад жэл боложо байна. Үхибүүдни, аша зээнэрни булта эндэл түрэһэн юм ааб даа. Тиигээшье һаа, уг гарбалаараа Агын зон гээшэбди гэжэ мэдэхэ. Хара багаһаань лэ тэрээниие ойлгуулһан хүн аабзаб. Теэдшье зун бүри нютагаа ошохо гэжэ оролдогшобди. Эндээшье энэ-тэрэ юумэнэй болоходо, заал һаа хабаадахаш. Тээсгэн театрта сугларжа, гоёор сагаалаабди. Нютагайнгаа зоной иигэжэ уулзаха арга олгожо байһан Агымнай эблэл - Баясхалан Раднагуруев түрүүтэй эдэбхитэй хүбүүд, басагад - тон бэрхэнүүд гэжэ хэлэхэ байнаб, тэдээндээ ехэ баяр хүргэнэб, - гэжэ үндэр наһатай Дондогой Цыренжаб үбгэн һанамжаяа хэлэнэ.

Улаан-Үдэ хотын, Буряад ороной ажабайдалай алишье һалбарида агынхид түрүү зэргэдэ ябадагынь бүгэдэндэ мэдээжэ. Энэ удаа болоһон найршье энээниие гэршэлээ. Илангаяа барилдаанай тэмсээндэ ялас гэмэ нэрэнүүд хойно-хойноһоо соностожо байгаа. Суута абарга Цыбик Максаров, дэлхэйн чемпион Баясхалан Эрдынеев, мүнөө түлэг наһандаа ябаһан түрүү бүхэшүүл Тамир Ешинимаев, Чингис Бальжимаев гэгшэд удаа дараалан хибэс дээрэ гаража, одоошье хужарлама барилдаа харуулаа. Барилдаанһаа гадна һур харбалга, шагай наадан, дартс, мини-футбол, волейбол, аргамжа таталга ба хүнгэн атлетикэ тус найрай үедэ болоһон байна. Тамиршадые амаршалжа, амжалта хүсэхэеэ Буряад Уласай Засагай газарай ба Арадай Хуралай, Улаан-Үдэ хотын Һунгамалнуудай зүблэлэй гэшүүд хүрэжэ ерээ.     

- Иимэ хэмжээ ябуулганууд арад зониие нэгэдүүлхэ хэрэгтэ тон шухала үүргэ дүүргэнэ. Эндэ гансашье Агын тойрогһоо гарбалтай зон хабаадана бэшэ, Буряад оронойшье түлөөлэгшэд олоороо оролсожо байна. Бүгэдэндэ амжалта хүсэнэб, - гэжэ Буряадай тамирай сайд Иван Козырев үгэ хэлэхэдээ тэмдэглээ. 

Дээрэ дурдагдаһан тамирай зүйл бүхэнөөр шанга гэгшын тэмсээнүүд болоо, юуб гэхэдэ, хабаадагшад ганса өөрыгөө түлөөлжэ бэшэ, харин түрэл нютагайнгаа нэрэ хүндые хамгаалжа байһанаа хүсэд мэдэржэ байгаа бшуу. Найрай дүүрэн дүүрэтэр хэмнай хэдыдэхи һуурида гарахань гээшэб, али нютаг амжалта туйлахань бэ гэжэ мэдэгдээгүй: ана-мана урилдаанай боложо байһые агаарта тунаһан абьяас шуналааршье тухайлхаар байгаа.

Ага нютагаархинай эблэлэй спартакиада энэ удаа 23 нютагай 1000 гаран хабаадагшадые суглуулаа. Тамирай зүйл бүхэнөөр илагшадта шагналнууд барюулагдажа, медальнууд зүүлгэгдэжэ, ниитэ дүнгүүд татагдахадаа, гурбадахи һуурида шандалиинхид, хоёрдохидо – зүдхэлиинхид гараба гэжэ элирээ.  Харин Хара-Шэбэр нютагай эбтэй эетэй команда шангай 1-дэхи һуури эзэлжэ, Улаан-Үдэ хотодо ажаһуудаг Ага нютагаархинай эблэлэй Кубогта, 50 мянган түхэригэй мүнгэн шанда хүртөө.

- Нёдондо гурбадахи һуурида гарахадаа, нүгөө жэл заатагүй илалта туйлахабди гэжэ өөһэдтөө үгэ үгөө һэмди. Тэрэ зорилгоёо бэелүүлбэбди. Мүнөөдэрэйнгөө амжалтаар нютаг дээрээ байһан зоноо тон ехээр баярлуулбабди. Угайдхадаа «Ударник» гэжэ тамирай клубаймнай байгуулагдаһаар, 60 жэл байгша ондо тэмдэглэгдэнэ. Тиимэһээ аймагайнгаа, тойрогойнгоо «Зунай наадануудташье» иимэл һайнаар хабаадаха ёһотойбди, - гэжэ Хара-Шэбэр нютагайхид энэ найрай дүн гаргангаа, удаадахи зорилгонуудаа тодорхойлно һэн.

«Патриот», «Эйс» спортклубууд соо, мүн Улаан-Үдын 2-дохи һургуулиин стадион дээрэ нэгэ зэргэ болоһон урилдаа мүрысөөнүүдэй эсэстэ Ага нютагһаа урган гараһан уран бэлигтэнэй, Буряадай арадай зүжэгшэд Баиржаб Дамбиев, Бадма Гомбожапов, Даба Дашинорбоев, һаяхана Буряадай габьяата зүжэгшэнэй нэрэ зэргэдэ хүртэһэн Тимур Болотов, оперын дуушан Саян Цымпилов, «Байгал» театрай гол дуушад Чимит Санжимитупов, Гэрэлма Жалсанова, эстрадын одод Дулма Сунрапова, Ким Харганаев гэгшэдэй хабаадалгатай гоё гэгшын тоглолто боложо, нютаг зоноороо уулзажа, тэмсээндэ хабаадажа, юрэ хажуу тээһээнь харажашье сэдьхэлээ ханаһан зон гар гараа барилсан, мүр мүрөө түшэлсэн, ёохор наадаяа хатаржа садаһанай һүүлдэ урматай дорюунууд гэр гэртээ таранад һэн.