Дахинаа Должон

Урда жэлдэ Должон Цынгуева олон тоото тамирта дуратайшуулые, барилдаанай мэргэ­жэлтэдые ехэтэ гайхуулаа һэн. 16 наһатай тамиршан наһанай хоёр бүлэгтэ Оро­сой чемпионой нэрэ зэргэдэ хүртөө бэлэй. Мүн Европын хибэс дээрэ гаража, наһа- най хоёр бүлэгтэ шангай 3-дахи һууринуудые эзэлһэн байна.

2025 ондошье Должон барилдаанда дуратайшуу­лые баярлуулһаар. Үнгэрһэн хабар 21 наһа хүрөөдүй та­миршадай дунда Оросой чемпионадта тэрэ дахинаа түрүүлжэ шадаа. Энэ шэнэ амжалтынгаа ашаар Оросой суглуулагдамал командын бүридэлдэ оруулагдажа, Ев­ропын чемпионадта хабаа­даха эрхэдэ хүртөө.

Италиин хибэс дээрэ Бу­ряадай залуу барилдаашан 57 килограммай шэгнүүртэ гараа. Түрүүшын үдэртэ тэрэ гурбан уулзалга үнгэргөө. Нэн түрүүн Турци болон Литва гүрэнүүдэй түлөөлэгшэдые илажа гараа. Хахад финалай уулзалгада Норвегиие түлөөлдэг Фе­лицитас Домажевада шүүг дэшөө. Удаань Скандинавиин барилдаашан чемпион боложо тодороо.

Шангай 3-дахи һуури эзэлхын түлөө Должон Цын­гуева Нидерланды гүрэнэй Цсилла Ван Ос гэгшые ба­рилдаанда үгтэһэн сагай түгэсөөгүй байхадань, 12:1 гэһэн тоотойгоор шүүжэ, хүрэл медаль абажа шадаа.

Орос гүрэнэй барилдаа­ша басагад энэ мүрысөөндэ алтан медальда хүртөөгүй. Тэдэ гурбан мүнгэн, табан хүрэл медальтай гэртээ бу­саба.