Түрүүшын дальбараанууд

Солонгосто тамирай зүйл боложо тодорһон тхэквондо бүхы дэл­хэйгээр хүгжэжэ байтараа, хэдэн эмхи боложо хубаар­шоо бэлэй. Тиигэжэ тхэквон­до ИТФ, тхэквондо МФТ, тхэк­вондо ВТФ, тхэквондо ГТФ гэһэн һалбаритай зүйлнүүд эгээл мэдээжэ болонхой. Олимпиин наадануудай бүридэлдэ тхэквондо ВТФ 2000 ондо оруулагдаа һэн.

Буряадта тхэквондо ИТФ болон тхэквондо МФТ гэһэн зүйлнүүд хүгжэнэ. Ород гүрэнэй, Европын болон дэлхэйн чемпионадуудта ам­жалта туйлаһан тамиршадаа спортдо дуратайшуул һайн мэдээд, таняад байдаг.

Үшөө тхэквондо ГТФ бии юм гэжэ Буряадта һаял мэ­дэржэ эхилэнхэй. Бага ал­хамуудые хэ хэһээр, үндэр орьёлдо хүрэжэ шадаба. Тхэквондо ИТФ-һээ урган гараһан мэдээжэ тамиршад, һоригшод Олеся Коршунова (Налпина), Геннадий Карны­шев гэгшэд шэнэ зүйлөөр үхибүүдые бэлдэжэ эхилээ.

Июлиин 22-27-ой үдэрнүүдтэ ОАЭ гүрэнэй Аль-Эйн хотодо дэлхэйн чемпионат эмхидхэгдээ. Хажуугаарнь үнгэтэ бүһэнүүдэй фести­валь болоһон байна. Ородой суглуулагдамал командын бүридэлдэ Буряадай табан тамиршан оруулагдаа. Хабар­таа тэдэ булта Ородой чем­пионадта сугларһан 64 можо хизаарай түлөөлэгшэдэй дунда шалгараа һэн. Тамир­шадай тэдэ амжалтануу­дынь Буряадай ажаһуугшад ехээр обёоронгүй үлэшөө гээд һанагдана. Тиимэһээ мүнөө туйлаһан илалтанууд бултаниие гайхуулба.

Тхэквондо ГТФ-ээр дэл­хэйн түрүүшын абарга Бу­ряадта бии болоо. Энэ хэн бэ гэбэл, Арсалан Николаев гээшэ. Арсалан хадаа 15-17 наһатай тамиршадай тоодо мүрысэһэн байна. “Хьенг” гэһэн шэглэлээр хубиин тоо- соондо түрүүлжэ гараа. Мэ­дээжэ тамиршан Олеся Кор­шунова (Налпина) дэлхэйн шэнэ чемпионтой хүдэлжэ, бэлэдхэл хэнэ.

Арсалан Николаев ха­даа апрель һарын һүүл ба­гаар Сочи хотодо Ородой чемпионадта алтан медаль абаһан байна. Тиигэжэ Бу- ряадай тамирта өөрынгөө нэрэ оруулжа, амжалтануу­даа үргэлжэлүүлбэ.

Бусад тамиршаднай үнгэтэ бүһэтэй тамиршадай фестивальда хабаадаба. Эр­дэни Дашанимаев тус хэм­жээндэ аяар гурбан алтан медальда хүртөө. Дари Бад­маева баһа гурбан амжал­та туйлаа - хоёр алтан, нэгэ мүнгэн медальнуудые эдир тамиршан абаһан байна.

12-14 наһатай эдиршүүлэй дунда Жаргал Гармаев бо­лон Агван Доржиев гэгшэд һайн дүнгүүдые харуулаа. Жаргал нэгэ мүнгэн, хоёр хүрэл медальнуудаар шаг­нагдаа. Агван нэгэ мүнгэн медаль абажа шадаа.

Дэлхэйн чемпионадта 25 гүрэнэй 650 гаран та­миршан хабаадаһан байна. Иимэ олон хүнүүдэй дунда түрүүшүүлэй тоодо ороһон Буряадайнгаа тамиршадаар омогорхонобди.