Эжынэр футбол наадана

Мүрысөөнүүдтэ Эрхүү хотын, Алайрай, Баяндайн, Оһын аймагуудай ба Эхирэд- Булагадай аймагай долоон команда хабаадаба. Санкт- Петербург хотоһоо “Футболой эжынэр” түсэлэй гол түлэб эмхидхэгшэ Эльвира Лесничая ерэжэ, тамирай хэм­жээ ябуулгануудые эрхилэн хүтэлбэрилһэн байна.

Эльвира гурбан хүбүүдэй эжы юм. Ехэ хүбүүниинь фут­болист һэн тула тэрэ 10 гаран жэлэй туршада бүхы арга ша­далаараа хүбүүндээ дэмжэл­тэ үзүүлжэ, мүрысөөнүүдтэнь ошолсодог байһан. Тиигээд өөрөө футбол наададаг боложо эхилээд, 2017 ондо Бүхэроссиин хэмжээндэ “Футболой эжынэр» гэһэн түсэл бэелүүлжэ эхилһэн. Эхэнэрнүүдые нэгэдүүлжэ, тамирша үхибүүдээ хүмүүжүүлхэдэнь дэмжэлтэ үзүүлхэ гээшэ гол зорилгонь болоно. Үшөө Эль­вира Лесничая бүхы гүрэн дотор эдир футболистнуудай эжынэрэй дундахи арюун сэ­бэрэй урилдаануудые эмхид­хэжэ үнгэргэдэг заншалтай.

Булта шагналда хүртөө

Усть-Ордын Буряадай той­рогой мүрысөөндэ эжынэр-футболистнуудай 13 команда сугларжа хабаадаһан байна. Команданууд, сэрэгэй маягаар, хоёр дивизионууд бо­ложо хубаараа. Нэгэдэхи дивизиондо 35-һаа доошо наһанай тамиршад, хоёрдохи­до – 35-һаа дээшэ наһатай эхэнэрнүүд ороһон байна.

Саашадаа эжынэр-футбо­листнуудай бүлгэмүүд алтан ба мүнгэн лигэнүүдээр ху­бааржа, шанга тулалдаанууд үнгэрһэн ушартай.

Мүрысөөнэй дүнгүүдээр хабаадаһан бүхы команда­нууд шагналда хүртөө. Нэ­гэшье тамиршан шагналгүй үлөөгүй, булта урмашуулаг­даа юм.

“Футболой эжынэр” ёохор хатараа

Үнгэрэгшэ 2024 ондо Усть- Ордын Буряадай тойрогой эжынэр Санкт-Петербург хо- тодо үнгэргэгдэһэн Бүхэроссиин “Футболой эжынэ­рэй” мүрысөөндэ амжалта­тайгаар хабаадажа ерэһэн. Тэндэ 48 командын дунда мүнгэн лигын дүрбэдэхи һуури эзэлһэн байна.

Тэрэ ехэ мүрысөөнүүдэй дүүрэхэ ёһолой үедэ Усть-Ордын “футболой эжынэр” буряад арадайнгаа үндэһэн заншалта хубсаһаар гаража, ёохор хатарһан юм. Шанга мүрысөөнүүдэй удаа эсэһэн сусаһан эхэнэрнүүдтэ олон харагшадтай стадионой тал­май дээрэ гаража, дуу хатар гүйсэдхэхэнь бэлэн бэшэ байгаа. Гансал манай буряад эхэнэрнүүд арадайнгаа хубсаһаар гаража хатараа гэжэ онсо тэмдэглэгдэнэ.