Дуулгата хадын үбэртэ...

Соёл уралигта эльгэтэй, үхи хүбүүдэй һүлдэ заяагша Янжи­ма бурхан эдэ жэлнүүдтэ үй түмэн зондо туһалаа. Хадын хүрэг шулуунда мүндэлһэн бурханда мүргэхэеэ, хүсэ шадал абахаяа, үри хүүгэдые үршөөгыт гэжэ зальбархаяа холо ойроһоо хүн зон таһалдадаггүй юм. Хабартаа могой һарада Янжима бурха­най найр боложо, һүзэгтэн олоороо суглардаг.

Тэбхэр ойн баярта зорюулагда­жа, Баргажанай дасанай дэр­гэдэ уласай хэмжээнэй шатар наадан эмхидхэгдээ. Мүрысөөнэй эхилхэһээ урид лама санаартан ам­галан байдалай түлөө ном табиба. Удаань хүгжэм дуута тоглолто боложо, сугларһан зониие баярлуулаа. Морин эрдэниин түбэргөөтэ аялгануудые хүгжэмшэн Сэлмэг Дамшаева морин хуураар зэдэлүүлээ. Жаргал Аюшеева болон Саяна Тыхеева гэгшэд уянгата һайхан хоолойгоороо уярма дуунуу­дые хангюурдаһан байна.

«Эрхим шатаршан» гэһэн нэрэ зэргэдэ хүртэхын түлөө 150 шатар­шад мүрысэбэ. Уласхоорондын зэр­гэтэй гроссмейстер Жамсаран Цыды­пов эгээл эрхим байһанаа гэршэлээ. Эмэгтэйшүүлэй дунда Улаан-Үдын түлөөлэгшэ Сойжина Комиссарова түрүүлээ. Эгээл дүршэлтэй наадагша гэжэ Цырма Ринчиновна Ачитуева нэрлэгдээ, харин эгээл эдир наадагша Сэлэнгын аймагай түлөөлэгшэ Олеся Дементьева болобо.

«Аргатын алтан таха» гэжэ нэрлэгдэһэн угаа һайхан газарта Жамса­ран Цыдыпов нэгэ доро олон зонтой тэмсэжэ, шатар наадаба.

Хүн зоной ухаан бодол хүгжөөхэ аргатай энэ наадан дэлгэржэ, олон зондо һонирхол түрүүлхэнь болтогой!