​​Буряадай тамиршадай ехэ амжалта

Светлана Доржиевагай фейсбук хуудаһанһаа гэрэл зураг абтаба

Якутск хотодо эрэшүүлэй дунда боксоор Ородой чемпионат октябриин 13-20-ой үдэрнүүдтэ үнгэргэгдэбэ. Энэ мүрысөөндэ Буряадһаа уг гарбалтай тамиршад ялас гэмэ амжалта туйлаа гээд хэлэхэ хэрэгтэй. Тэдэ хоёр алтан, нэгэ мүнгэн медальнуудта хүртэжэ, олон тоото спортдо дуратайшуулые аргагүйгөөр баясуулба.

Ородой суглуулагдамал командын ахамад һоригшо Эдуард Кравцовой тэмдэглэһээр, энэ мүрысөөн ехэ удха шанартай байгаа. Юуб гэхэдэ, Ородой суглуулагда­мал команда бүридхэгдөө. Тиигэжэ түрүү болон шангай һууринуудые эзэлэгшэдэй дунда шанга тулалдаанууд болохоор хараалагдана.

2019 ондо олон тоото удха ехэтэй мүрысөөнүүд болохоор хараалагданхай. Эгээл тэрэ тулалдаануудта 2020 ондо Олимпиин наадануудта ошохо тамиршадай нэрэнүүд элирүүлэгдэхэ. Сочи хотодо үнгэргэгдэхэ дэлхэйн чемпионадта баһа Токио ошохо путёвконууд тараагдаха. Тиимэһээ бидэ эгээл шанга тамиршадые эльгээхэ болонобди, - гэжэ Эдуард Кравцов мэдүүлнэ.

52 килограмм хүрэтэр шэгнүүртэ Тамир Гала­нов түрүү һуури эзэлээ. Хэжэнгэһээ уг гарбалтай хүбүүн дүрбэдэхиеэ Ородой чемпионой нэрэ зэргэдэ хүртөө. Энэ шэгнүүртэ тэрэ түрүүшынхиеэ эрхимлэбэ.

Бидэ зүб тэмсэлэй арга шэлэжэ, чемпион болооб­ди. Мүн Тамирай аргагүй ехэ дүй дүршэл шиидхэхы тулалдаанда гаража ерээ, - гэжэ түрүү һуури эзэлэгшын һоригшо Бато Батуев хэлэнэ.

Ородой чемпионат шүүхэдэ, жэлһээ жэлдэ хүндэ бо­ложо байна. Юуб гэхэдэ, һайн бэлэдхэлтэй хүбүүд олошор­но, - гэжэ илагша тэмдэглээ.

Тамир Галанов һоригшотоёо уржадэр, октябриин 22-то, Москвада Буряад Ула­сай Толгойлогшо Алексей Цыденовтэй уулзаһан байна. Ажалай хэрэгээр Ородой ни­ислэл хото ошоһон Алексей Самбуевич саг оложо, тамиршадые амаршалаа. Энээн тухай ниитын сүлжээндэ ма­най нютагай сурбалжалагша Наталья Тулаева мэдүүлнэ.

Алексей Цыденов тамиршадтай уулзаба

Буряад Уласай Арадай Хуралай хорооной хүтэлбэрилэгшэ Валерий Доржи­евай байгуулһан “Номто” гэһэн тамирай клубта Тамир Галанов һорилго хэдэг юм.

81 килограмм хүрэтэр шэгнүүртэ Бэшүүр аймагай Георгий Кушиташвили да­хинаа чемпионой нэрэ зэр­гэдэ хүртөө. Тэрэ хоёрдохиёо өөрын шэгнүүртэ түрүүлжэ гараа. Түгэсхэлэй уулзалгада Георгий Чечен Уласай Имам Хатаевые шүүжэ шадаа.

Энэ тамиршантай 2015 ондо Ородой чемпионадта баһа финалда уулзаһан бай­наб. Тиихэдэ баһа шүүжэрхёо һэм. Харин мүнөө илалта туйлахада хүндэшэг байгаа. Ородой чемпионой нэрэ зэр­гые бусааха гэһэн зорилгоёо бэелүүлбэ гээшэб. Саашадаа дэлхэйн чемпионадта бо­лон Олимпиин наадануудта шүүхэ һанаатайб. Тиимэһээ урдамни угаа ехэ ажал байна, - гэжэ Георгий Кушиташвили һанамжаараа хубаалдана.

Георгий Кушиташвили

49 килограмм хүрэтэр шэгнүүртэ Батор Сагалуев хоёрдохи һуури эзэлбэ. Дэл­хэйн чемпионадай мүнгэн медальда хүртэһэн, Олимпи­ин наадануудта хабаадагша, Саха-Яхад Уласай Василий Егоровтой Түнхэн нютагһаа уг гарбалтай тамиршан фи­налда уулзаһан байна.

Батор Сагалуев

Түнхэнэй Николай Ха­ранахоев болон Хэжэнгын Радна Цыбиков гэгшэд өөр өөрын шэгнүүртэ эр­хим 8 тамиршадай тоодо оролсоһониинь һайшаалтай.

Наталья Тулаева болон "Спортякутия" бүлгэмэй гэрэл зурагууд