​​Шалгарһан тамиршадта – гэр байра

Аяар холын Аргентинэ гүрэндэ болоһон эдиршүүлэй Олимпиин наадануудта мүнгэн медальда хүртэһэн Яна Енина, Анастасия Деревягина болон хабаадагша Виктория Харитонова гэгшэд нютагаа үнгэрһэн долоон хоногто бусаба. Шангай һуури эзэлһэн тамиршадтай Буряадай Толгойлогшо Алексей Цыденов уулзажа, 2,2 млн. түхэригэй үнэмшэлгэ тэдээндэ барюулаа. Холын харгыһаа угталгын хэмжээ ябуулгада тон үсөөн хүн хабаадаһан байна.

Дэлхэйн болон Европын чемпионадуудһаа шалгараад ерэһэн тамиршадай угталгые урда жэлнүүдтэ хараһан хүнүүд гайхалдан байгаа. Юуб гэхэдэ, тон баянаар, хүхюу зугаатай­гаар угтамжа болодог байгаа һэн. Энэ удаа оройдоол арбаад хүн байгаа. Амаршалгын үгэнүүдые бэшээтэй оройдоол нэгэ баннер харагдаа. Иимэ юумэ хараһандаа тамиршад уйдаа хэбэртэй.

Харин долоон хоногой эсэстэ эдиршүүлэй Олимпиин наадануудай мүнгэн медальда хүртэгшэдэй сэдьхэ­лэй байдал улам дээшэлээ. Юуб гэхэ­дэ, тэдээндэ квартира абаха мүнгэнэй тэдхэмжэ үзүүлэгдээ.

Уласай Толгойлогшотой уулзахаяа тамиршад һоригшодоороо ерээ.

- Түрэл Буряад Уласаа холо ой­гуур суурхуулжа ябанат. Танай амжалтанууд залуу халаанда жэшээ боложо үгэнэ, - гэжэ Алексей Цыденов амар­шалаа.

Сагаалса буудалгаар мэдээжэ һоригшо Владимир Бусовиков энэ амжалтые шэнэ тир хүдэлжэ эхилһэнтэй дашарамдуулна.

- Түбэй стадиондо шэнэ тир һаяхана ашаглалда тушаагдаһан бай­на. Тэрэ бүхыгөөрөө һүүлэй үеын саг­та болон уласхоорондын стандарт­да таарама болгогдонхой. Энэ хадаа манай уласай Засагай газарай элүүр энхэдэ, спортдо хандасые харуулна, - гэжэ Владимир Бусовиков мэдүүлнэ.

2018 оной эхиндэ Буряад Уласай Арадай Хуралай һунгамалнууд физкультура болон спорт хүгжөөхэ тала­ар хуулида нэмэлтэнүүдые оруулһан байна. Олимпиин, Паралимпиин, Сурдлимпиин болон эдиршүүлэй Олимпиин наадануудта шалгарһан тамиршадта квартира худалдан абаха мүнгэн тэдхэмжэ уласай бюджедһээ үгтэхэ ёһотой гэжэ баталагдаа. Тии­гэжэ хоёрдохи һуурида гараһан Яна Енина болон Анастасия Деревягина гэгшэдтэ 2,2 миллион түхэригтэ хоёр таһалгатай квартира абаха арга бо­ломжо үзүүлэгдэбэ.

Эдиршүүлэй түрүүшын Олимпиин наадануудай чемпион Алдар Бальжинимаев болон 2016 оной Олим­пиин наадануудай мүнгэн медальда хүртэгшэ Инна Степанова гэгшэд баһа квартиратай болоһон байна гээд һануулая.