​​Инна Ивахинова: “Ёохор хатараад, ёһоо мэдэг”

Буряадай мэдээжэ шатаршан, эхэнэрнүүдэй дунда уласхоорондын гроссмейстер Инна Ивахиновагай шатарай һургуулиин гурбадахи мүрысөөн түгэсэбэ.

“Пионер” гэһэн худалдаа наймаанай түбтэ болоһон тулалдаануудта һургуулида үшөө ошоогүй, һая эхилһэн тамиршад хабаадаһан байна. Хара-сагаан хюлгын саана амжалтануудые туйлаһан тамиршад һуугаа.

- Бидэ энэ хэмжээгээ “Hatar mix” гэһэн хатарай бүлгэмтэй хамта эмхидхэнэбди. Һунгалтын үедэ тэдэнтэй танилсажа, саашадаа суг хамта ажал ябуулха гэжэ хэлсэһэн байнабди. Манай һургуулиин үхибүүд бэлигтэй хатаршадые харахадаа, үндэһэн соёлоороо һонирхохо аабза, - гэжэ Инна Ивахинова найдана.

“Hatar mix” гэһэн хатарай бүлгэмэй хүтэлбэрилэгшэд наадануудай забһарлалда эдир шатаршадые ёохор наада хатаруулжа һургаһан байна.

Мүнөө үедэ Инна Ивахинова Буряад Уласай Арадай Хуралай һунгамал юм. Тэрэ суг хүдэлдэг Александр Бардунаев болон Николай Дашеев гэгшэдтэй Алдар Тыхеевтэ шан барюулаа. Алдар хадаа ургажа ябаа бэрхэ шатаршан юм. Өөрын наһанай бүлэгтэ Ородой чемпионадта тэрэ хоёрдохиёо хабаадахань. Новокузнецк хотодо болоһон Сибириин тойрогой мүрысөөндэ Алдар Тыхеев түргэн шатараар хоёрдохи һуури эзэлээ. Мүн классическа шатарай тулалдаануудта гурбадахи һуурида гараа.