​​Сагаан-хара хюлгын саана

Даам наадалгаар болон ша­тараар улас доторнай хэдэн мүрысөөнүүд боложол байдаг заншалтай. Эдээн тухай Ородой шүүгшэ Владимир Талханов манай сур­балжалагшада хөөрэжэ үгэбэ.

Даам

“Доверие” гэһэн наһатайшуулай гэр байрын дэргэдэ үндэр наһатайшуулай мүрысөөн һаяхана боложо түгэсэбэ.

Эрэшүүлэй дунда 6 очко абаһан Виктор Шагдыров түрүүлжэ гараа. Аяар дүрбэн хүн адли 5 очкотойгоор мүрысөөгөө түгэсөө. Тиигэжэ тэдээн сооһоо Владимир Сайбонов болон Владимир Талханов хоёр шангай һууринуудые эзэлээ гэжэ тодороо. Эхэнэрнүүдэй дунда Энгельсина Матвее­ва түрүүлжэ гараа.

Эдэл үдэрнүүдтэ Ивалга тосхондо эрэмдэг бэетэйшүүлэй дунда Буряад Уласай чемпионат боложо түгэсэһэн байна. Хүдөөгэй 6 аймагай болон Улаан-Үдэ хотын тамиршад мүрысөөндэ хабаа­даа.

Командна тоосоондо Улаан-Үдэ хотын Загорск һууринай инвалидуудай бүлгэм түрүүлжэ гараа. Александр Мельников, Константин Балдаев ба Светлана Шунко­ва гэгшэд түрүү һуури эзэлһэн командын бүридэлдэ наадаа. Советскэ болон Желез­нодорожно районуудай команданууд шан­гай һуури эзэлээ.

Хубиин тоосоондо Константин Балдаев болон Анастасия Бурунова (Советскэ рай­он) гэгшэд түрүү һууринуудые абаа.

Шатар

Даамаар тулалдаанай боложо байха­да, шатаршад баһал мүрысэһэн байна. Хубиин тоосоондо Ивалга аймагай Артём Садыков түрүүлжэ гараа. Эхэнэрнүүдэй дунда Сэлэнгэ аймагай Зоя Доржиева нэ­гэдэхи һуурида гараа.

Командна тоосоондо Ивалгын шатар­шад алтан медальда хүртөө. Артём Сады­ков, Цыден-Дамба Раднаев болон Люд­мила Батуева гэгшэд Ивалгые түлөөлһэн байна. Сэлэнгэ аймагай болон Железно­дорожно районой түлөөлэгшэд шангай һууринуудта гараа.

Эрхүү можын Кубогта хүртэхын түлөө нээмэл мүрысөөндэ Буряадай тамир­шад яһала һайн дүнгүүдые харуулаа. Энэ түргэн шатарай мүрысөөн 11 шатаһаа бүридөө.

Һүүлшын 11-дэхи шатада Буряадай 14 шатаршад хабаадаа. Ехэшүүлэй дунда Ев­гений Баглаев илалта туйлажа, Кубогай финалда хабаадаха эрхэдэ хүртөө. Эдир Эрдэм Хубукшанов болон Лев Сизов гэг­шэд баһа һүүлшын мүрысөөндэ наадаха эрхэдэ үнинэй хүртэһэн байна бшуу.

Финал декабриин 22-23-ай үдэрнүүдтэ болохоор хараалагдана.