​​Эдиршүүлэй эрхим дүнгүүд

Великие Луки хотодо “Ородой найдал” гэһэн һур харбалгаар бүхэроссиин мүрысөөндэ аяар 715 тамиршан хоёр наһанай бүлэгтэ хубааран хабаадаба. 38 можо, хизаарай түлөөлэгшэд эндэ хабаа­дагшадаа эльгээгээ. Буряад Уласай хүбүүд, басагад олоороо эндэ оролсожо, 7 медальтай гэртээ бусаба.

Тус хэмжээ ябуулга хэзээ хэзээнэйхиһээ олон тамиршадые суглуулаа. 1999-2001 болон 2002- 2004 онуудта түрэһэн хабаадагшад түрүү һууриин түлөө тулалдаа.

1999-2001 онуудай наһанай бүлэгтэ Буряадай тамиршад та­бан медаль абажа шадаа. Хубиин тоосоондо Санжи Халудоров бо­лон Аюна Манханова хоёрдохи һууринуудые эзэлээ. Гурбадахи һуурида Руслан Серебряков бо­лон Эржена Баирова гэгшэд га­раа. Алдар Гомбожапов, Руслан Серебряков болон Иннокентий Бакшаханов гэгшэдһээ бүридэһэн Буряадай суглуулагдамал коман­да энэ наһанай бүлэгтэ шалгаржа, мүнгэн медальда хүртөө.

2002-2004 онуудай тамирша­дай дунда Буряадай түлөөлэгшэд хоёр медаль абаа. Жаргал Сынде­ев хубиин тоосоондо мүнгэн меда­ляар шагнагдаа. 10-дахи спортын олимпиин халаанай һургуулиин команда хоёрдохи һуурида гараа. Эндэ Этигэл Цыденов, Галсан Жугдуров болон Жаргал Сындеев гэгшэд харбаа.

Буряадай һоригшодой мэдүүлһээр, ургажа ябаа залуу халаан яһала һайн дүнгүүдые харуулба гээшэ.