926
Монгол гүрэнэй элшэн сайдай зургаанда сүлөөтэ барилдаагаар дэлхэйн абарга, СССР-эй спортын габьяата мастер Борис Будаевые Улаан-Үдэдэ Монголой элшэн сайд Дамдин Чадраабал «Алтан гадаһан» орденоор шагнаба. Хоёр гүрэнүүдэй хоорондохи харилсаа хүгжөөлгэдэ горитой хубитаяа оруулһан хари гүрэнэй эрхэтэдтэ Монголой үндэр шагнал олгогдодог.
«Гушан жэлэй туршада Монгол гүрэн барилдахаяа ошодог байгааб. Тамиршадтай сугтаа һорилгонуудыешье үнгэргөөбди. Монголой ажаһуугшад барилдаанда ехэ дуратай», - гэжэ үндэр шагналда хүртэһэн Борис Будаев хэлэбэ.
Монгол Уласай Юрэнхылэгшэ Халтмагийн Баттулгын тогтоолдо спортын һалбарида Монгол, Ород гүрэнүүдэй харилсаа хүгжөөлгэдэ, үргэдхэлгэдэ горитой хубитаяа оруулһан Борис Будаевта «Алтан гадаһан» орден барюулагдана гэжэ бэшэгдэнхэй.
Буряад Уласай спортын болон залуушуулай бодолгын талаар сайд Вячеслав Дамдинцурунов Борис Будаевые амаршалба.
«Борис Дугданович хадаа агууехэ тамиршан. Шаналтайнь гэхэдэ, Борис Будаевта хүрэхэ, манай уласта сүлөөтэ барилдаагаар иимэ үндэр амжалта бэшэ туйлагдаадүй. Өөрөө жэшээ болон спорт, арадуудай хани нүхэсэл бидэндэ харуулжа ябана», - Вячеслав Дамдинцурунов тэмдэглэбэ.
Шагналай ёһололой һүүлээр ехэ хэмжээнэй урилдаануудта суг һорилго үнгэргэхэ тухай хэмжээ ябуулгада хабаадагшад хэлсэбэ. Спортын һалбарида ажал суг ябуулха тухай хэлсээ баталха гэжэ хоёр гүрэнүүдэй түлөөлэгшэд түсэблэбэ.
Буряад Уласай спортын болон залуушуулай бодолгын талаар яаманай мэдээсэлэй албанай гэрэл зураг
