​​Александр Богомоев хибэстээ бусаба

Үнгэрһэн долоон хоногой эсэстэ Владикав­каз хотодо “Аланы-2018” гэһэн уласхоорон­дын мүрысөөн үндэр хэмжээндэ болобо. Эндэ Буряадай барилдаашан Александр Богомоев гурбадахи һуури эзэлээ.

Энэ мүрысөөн оройдоол хоёрдохи жэлээ эмхид­хэгдэнэ. Хэды тиигэбэшье тулалдаануудай удха ша­нарынь ехэ болонхой гээд тоологдоно. Юуб гэхэдэ, эндэ түрүү һуури эзэлһэн тамиршад январь һарын һүүл багаар болодог “Иван Ярыгинай Гран-при” гэһэн уласхоорондын мүрысөөндэ хабаадаха эрхэдэ хүртэнэ.

Нёдондо жэлһээ Красноярскын хибэс дээрэ Ород гүрэнэй оройдоол гурбан тамиршан шэгнүүр бүхэндэ гарадаг болонхой. Урдандаа энэ тоо ехэ бай­гаа, шэгнүүр бүхэндэ табан түлөөлэгшэ барилдадаг һэн. Энээнһээ гадна, Сибириин болон Красноярска хизаарай суглуулагдамал команданууд өөрын та­миршадые табидаг байгаа бэлэй. Энэ ушарһаа бо­ложо, шанга гэгшын шэлэн абалга үнгэрдэг болон­хой. Ородой командын ахамад һоригшо Дзамболат Тедеевэй хэлэһээр, “Аланы” болон суута Дмитрий Миндиашвилиин шанда хүртэдэг мүрысөөнүүдтэ шүүһэн тамиршад “Иван Ярыгинай Гран-придэ” ха­баадаха эрхэдэ хүртэнэ. Мүн дэлхэйн чемпионадта барилдаһан тамиршад иимэ эрхэтэй юм.

200 гаран тамиршад Владикавказай хибэс дээрэ гараа. Тэдээн соо Буряадай табан барилдаашан тус мүрысөөндэ хабаадаһан байна.

Яһала үни барилдаагүй Александр Богомоев энэ мүрысөөндэ хабаадажа, һайн бэлэдхэлтэй байһанаа харуулаа. 2017 ондо Александр Богомоев ехээр со­хюулаа һэн гээд һануулая. Мүн 2018 ондо тэрэ хар­гын аюулда ороһон байна. Тиимэһээ нилээд удаан эмнэлгэ гараа.

“Аланыда” тэрэ 61 килограмм хүрэтэр шэгнүүртэ барилдаа. Буряадай барилдаашан Саха-Яхадай Эду­ард Григорьев ба Пётр Павлов, Дагестанай Загир Шахиев гэгшэдые шүүжэ гараа. Хахад финалда Гру­зиин Бека Ломтадзетай ана-мана тулалдаа. Энэ уул­залга 7:7 гэһэн тоотойгоор дүүрээ. Тиихэдэ Грузиин барилдаашан һүүлшын очконуудые абаһанһаа боло­жо, илагша гэжэ тодороо. Гурбадахи һуури эзэлхын түлөө уулзалгада Александр Богомоев Дагестанай Магомедрасул Идрисовые 4:3 гэһэн тоотойгоор шүүжэ, хүрэл медальда хүртөө.

Энэл шэгнүүртэ Эрхүү можын Юлиан Гергенов баһа шалгараа. Тэрэ гурбадахи һуури эзэлээ.

57 килограмм хүрэтэр шэгнүүртэ һайн барилдаа Жаргал Дамдинов харуулаа гээд хэлэхэ хэрэгтэй. Энэ залуу барилдаашанай һүүлшын дүнгүүд яһала ургажа байна гээд мэргэжэлтэд тэмдэглэнэ. Влади­кавказда Жаргал табадахи һуури эзэлээ.

Алексей Боровицкий, Даша Шарастепанов бо­лон Булат Баясхалонов гэгшэд барилдажа, шангай һууринуудые эзэлжэ шадаагүй.