​​Шатарай һонинууд

Шэнэ жэлэй амаралтын үдэрнүүдтэ шатарай турнирнууд олоор эмхидхэгдээ. Эдэ бүгэдые уншагшадтаа дуулгаха һанаатайбди.

Санкт-Петербург. Түргэн шатараар болон блиц-наадаар дэлхэйн чемпионат үнгэргэгдэбэ. Тус мүрысөөндэ Буряадай шатаршан, уласхоорондын мастер Жамсаран Цыдыпов шанга тамиршадтай уулзаа. Тиигэжэ дэлхэйн чемпион ябаһан Энэдхэгэй шатаршан Вишванантан Анандые шүүжэ шадаа. Хэдышье 30-40-дэхи һууринуудые тэрэ эзэлбэл, Буряадай түүхэдэ орожо шадаа.

Ижевск. Һургуулиин наһанай үхибүүдэй дунда бүхэроссиин мүрысөөн үнгэргэгдэбэ. Эндэ Буряадай  Мария Хамнуева 13 хүрэтэр наһанай шатаршадай дунда алтан медаль абаһан байна. Тус амжалтын хүсөөр тэрэ апрель соо Тунисай дэлхэйн чемпионадта хабаадаха эрхэдэ хүртөө. Манай үшөө нэгэ шатаршан Лариса Бубеева шангай хоёрдохи һуури эзэлээ.

Брянск. Хүүгэдэй дунда Ородой Кубогта хүртэхын түлөө мүрысөөнэй финальна шатын нааданууд олоной анхарал татаа. Инна Ивахиновагай шатарай һургуулиин шаби Номина Дармаева 11наһа хүрэтэр наһанай бүлэгтэ һүүлшын шатада орожо шадаа. Эндэ эрхим 8 шатаршад тулалдаһан байна гээд хэлэлтэй.Номина хадаа 3,5 очко абажа, дүрбэдэхи һуурида гараа.

Улаан-Үдэ. Ветерануудай дунда Буряад Уласай чемпионат 79 хүниие суглуулба. Эрэшүүлэй дунда Гусиноозёрск хотын Анатолий Рушаков түрүүлжэ, гурбадахияа чемпион болоһон байна. Эхэнэрнүүдэй дунда Ивалга аймагай Людмила Абзаева анха түрүүшынхиеэ түрүү һуури эзэлбэ. Түнхэнһөө уг гарбалтай шатаршан Буряадай чемпионадуудта табадахин хоёрдохи һуурида гараһан намтартай. Одоошье 2019 ондо тэрэ нэгэдэхиһуури эзэлжэ шадаа.

Людмила Абзаева түрүүлбэ

Борис Балдановай гэрэл зураг

Улаан-Үдэ. “Рождество-2019” гэһэн гаршагтай гурбан мүрысөөн амаралтын үдэрнүүдтэ Буряадай ниислэлдэ эмхидхэгдэбэ. “В” мүрысөөндэ 67 эдиршүүл наадажа, Радна Батомункуев болон ЭрженаРинчино гэгшэд түрүү һууринуудта гараа. 60 хүнэй хабаадаһан “Б” мүрысөөндэ Михаил Базаров болон Дарина Дамбаева гэгшэд нэгэдэхи һууринуудые эзэлээ. “А” мүрысөөндэ Буряадай шатарай ерээдүйн найдалнууд наадаһан байна. 50 хабаадагшадай тоодо ганса Буряадтаа бэшэ, мүн бүхэроссиин ба уласхоорондын мүрысөөнүүдтэ шалгарһан хүбүүд, басагад оролсоо. Эндэ Кирилл Базырцыренов түрүүлһэн байна. Бүхы хабаадагшадай дунда гурбадахи һуурида гараһан Ага нютагай Яна Жапова басагадай дунда шалгараа.

Ивалгын дасан. Мартын 8-10-айүдэрнүүдтэ “Даша Чойнхорлин” гэһэн Буддын шажанай ехэ һургуулиин шангуудта хүртэхын түлөө “Сагаалха” уласхоорондын мүрысөөн үнгэргэгдэхөөр хараалагдана. Түргэн шатараар Ородой Кубогай нэгэ шатань боложо үгэнэ гээшэ. Абаһаар лэ тус мүрысөөн олоной анхарал татаа, мэдээжэ шатаршадта һайшаагдаа. Хэдэн гүрэнүүдэй уласхоорондын гроссмейстернүүд Ивалгын дасан буужа, шанга гэгшын тулалдаануудта хабаададаг заншалтай. Энэшье удаа 10гаран гроссмейстернүүд ерэхээ бэлдэлгэ эхилэнхэй.

Ород гүрэн дотор энэ мүрысөөн эгээл олон хабаадагшадтай гэжэ алдаршаһан юм. Жэл бүри 700 гаран шатаршад нэгэ доро һонирхолтой наада харуулха гэжэ оролдоно.