​Шанга тулалдаанда шалгарагшад элирбэ

Эгээл бага наадагшад

Даам наадалгаар Буряад Уласай чемпионууд наһанай зургаан бүлэгтэ тодорһон байна. Энэ мүрысөөн Хэжэнгэ һууринда январиин 4-7-ой үдэрнүүдтэ үндэр хэмжээндэ үнгэргэгдөө.

Тулалдаануудай ахамад шүүгшэ Владимир Талхано­вай хэлэһээр, мүрысөөнэй үедэ түрүүшүүл ород болон улас­хоорондын даам наадалгаар элирүүлэгдээ.

- Ород даам нааданай хюл­гэ 64 клеткэһээ бүридэнэ. Мүн уласхоорондын даамда 100 клет­кэтэй хюлгэ хэрэглэгдэнэ. Тиихэ­дэ дүримүүдынь ондоо юм, - гэжэ Владимир Талханов абаһаар лэ ойлгуулна.

Хүйтэнһөө боложо гү, али он­доо шалтагаанһаа олон шанга да­амшад мүрысөөндэ хабаадаагүй. Тиигэжэ уласай оройдоол дүрбэн аймагай, Улаан-Үдэ хотын тамир­шад энэ тэмсээндэ оролсоо. Эрхүү можын Ново-Ленино һууринай даамшадай Хэжэнгэ ерэһэндэнь һайшаамаар.

- Мүрысөөнэй нээлгын баяр ёһололдо Хэжэнгэ аймагай засаг дарга Геннадий Зундуевич Лхаса­ранов, аймагай һунгамалнуудай зүблэлэй түрүүлэгшэ Доржо Бальжинимаевич Бадмаев гэгшэд хабаадажа, һайхан үгэнүүдые хэ­лээ. Мүн бусад хүндэтэ айлшад су­гларагшадые амаршалаа. Энэ ехэ һайшаалтай. Юуб гэхэдэ, манай даам наадалга Хэжэнгэдэ һайнаар хүгжэжэ байһые гэршэлнэ. Мүн аймагай ноёд һайдай даамда ан­харалаа хандуулһандань баяр­тайбди, - гэжэ Владимир Талханов хэлэнэ.

Эгээл багашуулһаа, 8 наһатайһаа бага үхибүүдэй дундаһаа Ново-Ленино һууринай Александр Матвеев хоёр алтан ме­дальда хүртөө. Улаан-Үдын Арю­на Бальжирова болон Хэжэнгын Долгорма Гуруева гэгшэд эгээл эдир басагадай дунда шалгараа.

2009-2010 онуудай үхибүүдэй дунда Хэжэнгын Бадма-Доржо Бадмацыренов хоёр дахин чемпи­оной нэрэ зэргэдэ хүртөө. Хэжэн­гын Анастасия Мадасова болон Ново-Ленино һууринай Елена Ха­загаева гэгшэд басагадай дунда түрүүлһэн байна.

2006-2008 онуудай хүүгэдэй дунда Хэжэнгын Бэлигтэ Болотов, Дима Молоков, Вероника Тун­жинова болон Бэшүүр аймагай Адиса Очирова гэгшэд нэгэдэхи һууринуудые эзэлээ.

2003-2005 онуудай бүлэгтэ олон һонирхолтой нааданууд болоһон байна. Загарай аймагай Егор Модогоров, Улаан-Үдын Бато Будаев гэгшэд түрүүлээ. Хоёр да­хин чемпионой нэрэ зэргэдэ Но­во-Ленино һууринай Екатерина Кунтеева хүртөө.

Хэжэнгын Жаргал Пунсыков, Цырен Гатапов болон Сэлмэг Ба­туева гэгшэдтэй тэмсэхэ хүнүүд 2000-2002 онуудай тамиршадай дунда олдоогүй.

Ехэшүүлэй дунда Даба Цырен­доржиев болон Ринчима Бадма­цыренова гэгшэд хоёр-хоёр алтан медальнуудые абажа шадаа.

Тус мүрысөөндэ шалгарһан тамиршад Сибириин болон Алас Дурна зүгэй федеральна тойро­гуудай мүрысөөнүүдтэ хабаадаха эрхэдэ хүртөө. 

Владимир Талхановай гэрэл зураг